Innlent

For­eldra­fé­lag MR segist virða kröfur kennara en gagn­rýnir verk­fall

Gunnar Reynir Valþórsson skrifar
Verkfall hefst í MR á mánudaginn verði ekki samið fyrir þann tíma.
Verkfall hefst í MR á mánudaginn verði ekki samið fyrir þann tíma. Vilhelm

Stjórn Foreldrafélags Menntaskólans í Reykjavík sendi í gærkvöldi frá sér ályktun þar sem þungum áhyggjum er lýst af áhrifum verkfalls kennara á nemendur skólans, sem og á aðra aðila sem verkfallið hefur haft og mun hafa, ef áfram heldur sem horfir.

Ef ekki verður samið á næstu dögum hefst verkfall í MR á mánudaginn kemur. Foreldrarnir segjast skilja og virða réttmætar kröfur kennara í kjarabaráttu sinni. Mikilvægt er að staðið sé við gerða samninga og nauðsynlegt að sýna kennurum og starfi þeirra virðingu. „Þeir hafa stuðning okkar enda framlag þeirra ómetanlegt,“ segir ennfremur.

Stjórnin bendir þó á að verkfallsvopninu sé hins vegar að þessu sinni beint af þunga gagnvart aðeins hluta nemenda, þar á meðal nemendum MR. „Þessir nemendur geta hvorki haft áhrif á lausn deilunnar eða vikið sér undan henni en hún getur haft verulega neikvæð áhrif á skólagöngu þeirra og vellíðan.“ Foreldrarnir benda einnig á úrskurð Umboðsmanns barna á dögunum þar sem segir að börnum í þeim skólum sem eru í verkfalli sé mismunað hvað varðar rétt þeirra til menntunar.

Foreldrarnir benda á að viðræður milli aðila hafi því miður ekki enn skilað þeim árangri sem stefnt var að. „Við hvetjum samningsaðila til að leita allra leiða til að binda sem fyrst enda á þessa deilu og hlífa þannig nemendum,“ segir að lokum. 

Yfirlýsingin í heild sinni:

Reykjavík, 12. nóvember 2024

Stjórn Foreldrafélags Menntaskólans í Reykjavík hefur þungar áhyggjur af áhrifum verkfalls kennara á nemendur skólans, sem og aðra aðila sem verkfallið hefur haft og mun hafa, ef áfram heldur sem horfir.

Við skiljum og virðum réttmætar kröfur kennara í kjarabaráttu sinni. Mikilvægt er að staðið sé við gerða samninga og nauðsynlegt að sýna kennurum og starfi þeirra virðingu. Þeir hafa stuðning okkar enda framlag þeirra ómetanlegt.

Verkfallsvopninu er hins vegar að þessu sinni beint af þunga gagnvart aðeins hluta nemenda, þar á meðal nemendum Menntaskólans. Þessir nemendur geta hvorki haft áhrif á lausn deilunnar eða vikið sér undan henni en hún getur haft verulega neikvæð áhrif á skólagöngu þeirra og vellíðan. Eins og fram kemur í úrskurði Umboðsmanns barna[1]: „Þó verkfallsrétturinn sé óumdeildur verður ekki litið fram hjá því að börn eru skólaskyld og þau eiga stjórnarskrárvarinn rétt til menntunar og fræðslu. Að mati umboðsmanns barna er börnum í þeim skólum sem eru í verkfalli mismunað hvað varðar rétt þeirra til menntunar“.

Stjórnin leggur áherslu á orð umboðsmanns barna og bendir á alvarlegar afleiðingar verkfallsins sem getur orðið til þess að „viðkomandi nemendur verði af rétti sínum til menntunar og standi þar af leiðandi jafnöldrum sínum ekki jafnfætis“. Fjarvera frá skóla getur aukið líkur á að börn þrói með sér skólaforðun og fjarveran getur einnig haft „óafturkræfar afleiðingar fyrir börn að geta ekki sótt skóla og fyrir sum börn er skólinn griðastaður sem veitir öryggi sem þau njóta ekki annarsstaðar“. Sýnum þessu börnum og ungmennum nærgætni.

Nú er í boði að láta ganga betur. Það er skýlaus krafa okkar að samningsaðilar vinni hratt og markvisst að lausn deilunnar þannig að fórnarkostnaðurinn leggist ekki á þessa nemendur. Þótt úrlausn kjarasamningsákvæða frá 2016 sé flókið mál og nái til fleiri hópa en kennara er nauðsynlegt að finna lausn á því. Viðræður milli aðila hafa því miður ekki enn skilað þeim árangri sem stefnt var að. Við hvetjum samningsaðila til að leita allra leiða til að binda sem fyrst enda á þessa deilu og hlífa þannig nemendum.

Stjórn Foreldrafélags Menntaskólans í Reykjavík.

Kennaraverkfall 2024 Framhaldsskólar Skóla- og menntamál Kjaramál

Tengdar fréttir

Leikskólastarfsmenn í Hafnarfirði greiða atkvæði um verkfall

Félagsmenn verkalýðsfélagsins Hlífar sem starfa á leikskólum Hafnarfjarðar greiða ný atkvæði um verkfall. Verði tillagan samþykkt fara starfsmenn í verkfall í tvo sólarhringa á tímabilinu 21. nóvember til 5. desember. 

Segja ýmis skref hafa verið stigin til að jafna laun kennara

Samband íslenskra sveitarfélaga segir að frá árinu 2016, þegar samkomulag hafi verið gert um jöfnun launa á almennum og opinberum markaði, á milli ríkis, sveitarfélaga, BHM, BSRB og KÍ, hafi ýmis skref verið stigin til þess að ná samkomulagi. Það sé ekki rétt, eins og KÍ, hefur haldið fram að ekkert hafi verið gert til að tryggja slíkt samkomulag. Það kemur fram í yfirlýsingu á vef Sambands íslenskra sveitarfélaga í dag.

Baráttufundur en enginn samningafundur

Lítið þokast í kjaradeilu kennara og sveitarfélaga og ríkisins. Enginn samningafundur hefur verið boðaður í deilunni og óvíst hvenær næst verður fundað

Mest lesið


Fleiri fréttir

Sjá meira


×

Mest lesið