Leik­fé­lag Hafnar­fjarðar lagt niður

Leikfélag Hafnarfjarðar var lagt niður 29. október síðastliðinn á aðalfundi félagsins. Kemur fram í tilkynningu á Facebook-síðu leikfélagsins að ákvörðunin hafi átt sér afar langan aðdraganda. 

Í greinargerð stjórnar kemur fram að „undanfarin ár hefur leikfélagið verið á hrakhólum, ýmist húsnæðislaust eða með takmarkaða aðstöðu til þess að vinna að markmiði sínu. Virkir félagar eru fáir eftir og sjóður leikfélagsins á þrotum.“

Leikfélag Hafnarfjarðar hefur starfað frá árinu 1936 með hléum með það að markmiði að efla og iðka leiklist í Hafnarfirði. Allar eignir félagsins verða afhentar bæjarstjórn Hafnarfjarðar til varðveislu þar til félagið tekur aftur til starfa. 

Húsnæðisvandamál haft mikil áhrif

Ingveldur Lára Þórðardóttir, varaformaður fráfarandi stjórnar Leikfélags Hafnarfjarðar, segir að húsnæðisvandamál félagsins hafi haft mikil áhrif. Leikfélagið hafi verið heimilislaust frá árinu 2021.

„Okkur fannst vera kominn tími til að fólk fengi að njóta þess að iðka leiklist í stað þess að vera í einhverju húsnæðisbasli,“ segir hún. Flestir meðlimir félagsins séu nú komnir í önnur leikfélög á höfuðborgarsvæðinu.

„Leikfélag Hafnarfjarðar deyr aldrei, það leggur sig um stund og safnar kröftum og fer svo fíleflt aftur í gang þegar aðstæður innan bæjarins eru því hagstæðari,“ kemur fram í skýrslu formanns. 

Ingveldur vonar að starfsemin verði tekin aftur upp þótt að hún sjálf sé farin í annað leikfélag.