Segja gjald á nikótín­púða leiða til aukinna reykinga

Lagt er til að tekið verði upp tuttugu króna gjald á hvert gramm níkótínpúða og fjörutíu krónur af hverjum millilítra af vökva í rafrettum í bandorminum svokallaða, frumvarpi fjármálaráðherra um breytingar á ýmsum sköttum og gjöldum, sem liggur fyrir á Alþingi.

Reiknað er með að gjaldið hækki verð á nikótínpúðadósum um þrjú hundruð krónur og einnota rafrettum um áttatíu krónur. Nikótínpúðar og rafrettur hafa fram að þessu að mestu verið undanþegnar gjaldtöku sem er lögð á áfengi og tóbak.

Afleiðing gjaldsins er að verð á nikótínpúðadós hækkar allt að tvöfalt og verði dós með tuttugu púðum því á svipuðu verði og pakki með tuttugu vindlingum, að því er kemur fram í umsögn frá Ragnari Orra Benediktssyni fyrir hönd nikótínpúðaverslunarkeðjunnar Svens um frumvarpið. Á sama tíma hækki rafrettur um sautján prósent í verði.

Í þessu felist neyslustýting frá nikótínpúðum til rafrettna og tóbaks sem Ragnar Orri skrifa að geti ekki verið í samræmi við lýðheilsusjónarmið.

„Ef skatturinn yrði lagður á eins og hann liggur fyrir Alþingi núna mun rafrettunotkun margfaldast og tóbaksnotkun aukast á mjög skömmum tíma,“ segir í umsögninni.

Að mati fyrirtækisins urfi að hækka skatt á tóbak um fimmtíu til hundrað prósent ef lýðheilsusjónarmið eiga að liggja til grundvallar skattlagningu á nikótínvörum.

Innflutnings- og dreifingarfyrirtækið Dufland tekur í sama streng í sinni umsögn. Með því að færa staðgönguvörur tóbaks í sama verðflokk og tóbak sé vegið að því markmiði að draga úr tóbaksneyslu barna og ungmenna.

Landlæknisembættið lýsti yfir eindregnum stuðningi við frumvarpið í sinni umsögn. Það taldi þó að einnig hefði komið til greina að miða gjaldið við nikótínmagn varanna þar sem það gæti vrikað sem hvati til að minnka styrkleika nikótíns í þeim almennt.

Ekki heil brú í að skattleggja umbúðirnar

Þá gerir Svens athugasemd við að taka eigi gjald af heildarþyngd nikótínvara en ekki nettóþyngd. Þetta þýði að þyngd dósarinnar hafi áhrif á gjöld af púðunum. Ekki sé heil brú í því að skattleggja umbúðir vörunnar.

Krefst fyrirtækið þess að gjaldtökunni verði frestað og vandað betur til verka við hana eða að kveðið verði um eins árs aðlögunartímabil. Þá vill það að gjaldið verði lækkað verulega þannig að rafrettur og tóbak verði ekki „helsti kostur neytenda vegna verðmunar við nikótínpúða“.

Dufland gagnrýnir harðlega í sinni umsókn hversu brátt fyrirhugaða gjaldið ber að og hversu hátt það er. Örfáir dagar hafi verið gefnir til samráðs um gjaldtöku sem eigi eftir að þvinga innflutnings-, dreifingar- og smásölufyrirtæki til þess að auka álagningu á vöruna.

„Neytandi mun því upplifa tvöföldun á neysluverði,“ segir í umsögninni.

Fréttin hefur verið uppfærð.