Um­sókn frá Kristjáni á borði Jóns og Bjarna

Bjarni Benediktsson, forsætisráðherra og matvælaráðherra í starfsstjórn, tilkynnti sjálfstæðismönnum í gær að Jón, sem tapaði í atkvæðagreiðslu í kjördæmaráði um sæti á framboðslista í Suðvesturkjördæmi um helgina, yrði sérstakur fulltrúi hans í matvælaráðuneytinu.

„Að jafnaði eru ráðherrar með tvo aðstoðarmenn í hverju ráðuneyti. Við erum ekki að bæta við ráðherrum í starfsstjórninni þó þrír ráðherrar hafi horfið á braut. En það er ljóst að það er umfangsmikið starf að taka að sér þrjú ráðuneyti. Ég óskaði eftir því við Jón að hann kæmi mér til aðstoðar. Við erum að ganga frá forminu á því á næstu dögum. Jón er að koma í matvælaráðuneytið til þess að létta undir með mér þessar vikur sem starfsstjórnin verður að störfum,“ segir Bjarni.

Kosið verður til Alþingis þann 30. nóvember og í framhaldinu munu flokkarnir sem bjóða fram gera tilraun til að mynda nýja ríkisstjórn. Starfsstjórn undir forystu Bjarna Benediktssonar mun því að lágmarki starfa eitthvað inn í desember eða þar til tekst að mynda nýja ríkisstjórn.

Bjarni segir stöðu Jóns ekki ígildi ráðherrastóls eða vararáðherra.

„Við erum ekki að setja nýjan ráðherra, vararáðherra eða eitthvað slíkt. Hann er ekki með vald til að taka stjórnsýsluákvarðanir heldur er mér til aðstoðar við að undirbúa mál og taka ákvarðanir í þeim.“

Tryggja að hlutir gangi sinn vanagang

Jón hafi ekki lausan tauminn í ráðuneytinu.

„Við erum með aðstoðarmenn í öllum ráðuneytum sem eru ráðherrunum til stuðnings og geta fylgt eftir áherslum ráðherranna. Augljóslega erum við í sérstöku fyrirkomulagi með starfsstjórn, ríkisstjórnin er til bráðabirgða, en hlutirnir verða að geta gengið sinn vanagang. Ég hef sagt við alla í ráðuneytunum sem að eiga hér undir, bæði félagsmálaráðuneytinu og matvælaráðuneytinu og eins í forsætisráðuneytinu, að við erum aðallega til að tryggja að hlutirnir geti gengið sinn vanagang og allt sé í föstum skorðum. Það þarf að gefa út leyfi, afgreiða umsóknir, taka við skýrslum starfshópa og eftir atvikum setja inn fólk sem þarf að skipa slíka hópa og annað þess háttar.“

https://www.visir.is/g/20242640105d/segir-rad-herra-bera-skyldu-til-ad-af-greida-um-soknir-um-hval-veidar

Svandís Svavarsdóttir, þáverandi matvælaráðherra, frestaði tímabundið upphafi hvalveiða í fyrra sem vakti reiði sjálfstæðismanna í ríkisstjórn. Umboðsmaður Alþingis komst að þeirri niðurstöðu í ár að ákvörðun hennar hefði ekki átt nægilega stoð í lögum. Varðandi hvort hvalveiðileyfi verði gefið út segir Bjarni:

„Það verður bara að koma í ljós í hvaða stjórnsýsluferil það fer. Ef að tími er til þá getur það gerst.“

Umsókn frá Hval í ráðuneytinu

Bjarni staðfestir að umsókn hafi borist frá Hval hf., hvalveiðifyrirtæki Kristjáns Loftssonar.

„Umsókn er komin til ráðuneytisins.“

Hún verði tekin til meðferðar.

„Já, eins og alltaf er. Eins og með öll önnur leyfi þá þurfa þau að fara í sína stjórnsýslulegu meðferð.“

Jón vandaði fyrrverandi samstarfsfólki sínu í Vinstri grænum ekki kveðjurnar í Bítinu í morgun. Taka þyrfti til í öllum greinum á málefnasviði ráðuneytisins á þeim skamma tíma sem væri til stefnu fram að kosningum 30. nóvember. Vinstri græn hefðu gengið mjög illa um grundvallaratvinnuvegi landsins og gengið fram af þjóðinni.

Þá sakaði hann forvera Bjarna í embætti matvælaráðherra um að hafa gengið „sóðalega“ fram í hvalveiðimálum og tók undir með spyrli að vinstri græn væru óvinir atvinnulífsins og á móti verðmætasköpun.

„Það er augljóst. Þau hugsa í álögum. Þau hugsa í einhverjum girðingum. Ef þau væru raunverulega með alvöru völdin þá kæmumst við lítt áfram alveg eins og þessi stefna sem þessi flokkur stendur fyrir hefur sýnt sig annars staðar í heiminum,“ sagði Jón.

Bjarni vildi ekki tjá sig um orð Jóns í Bítinu þar sem hann hefði ekki heyrt viðtalið. Aðspurður um eigin skoðun á hvalveiðum segir Bjarni:

„Ég hef alltaf verið fylgjandi því að veiðar séu stundaðar og við förum sjálf með okkar fullveldisrétt í því máli.“