Mary drottning hafi undrast á um­ræðu um brúna skó Björns

Danmerkurheimsókn Höllu hefur verið mikill fréttamatur undanfarna daga og allar hliðar heimsóknarinnar verið undir nálarauga; klæðaburður hennar og eiginmannsins, hegðun og ræðuhöld sem dæmi.

„Ég hugsa að allar konur, sem gegna áberandi störfum, allavega á bakvið luktar dyr, ræða það að þessu fylgir aukaálag og fyrirhöfn. En þú verður, ef þú ætlar að vera í svona hlutverki, að bara átta sig á því að þetta er hluti af því. Ég get sagt að það vakti athygli hjá mér, og jafnvel dönsku drottningunni, að umræða um brúna skó eiginmanns míns hefði verið mest lesna fréttin á Íslandi eftir dag þar sem margar aðrar innihaldsríkar fréttir urðu til,“ segir Halla sem ræddi málið í Bakaríinu á Bylgjunni í dag. 

Hún bar brúnu skóna saman við „klútabyltinguna“ frá kosningunum í vor, og segir „brúna-skóbyltingin“ hafa farið af stað daginn eftir fréttaflutninginn. 

„Til að sýna forsetagæjanum stuðning. Ég hef auðvitað ekki yfir neinu að kvarta, fólk er að lesa þessar fréttir mest, en ég held að við ættum að velta því fyrir okkur að fréttir um innihald ræðunnar það sem fór hæst,“ segir Halla og bætir við að vinátta og tengsl þjóðanna hafi styrkst eftir heimsóknina.

Greint var frá því í síðustu viku að halla hafi kæðst kjól sem kostar um 642 þúsund íslenskar krónur í hátíðarkvöldverðinum sem haldinn var síðastliðinn þriðjudag. 

„Ég kaupi öll mín föt sjálf,“ segir Halla spurð út í kjólinn sem fjallað var um. Hún segist upprunalega hafa ætlað, í samstarfi við Björgu í Spakmannsspjörum, að endurnýta efnið úr kjólnum sem Halla klæddist á innsetningarathöfninni í sumar, í nafni sjálfbærni. Í ljós kom að nælurnar sem Halla átti að bera festust ekki í því efni og þá voru góð ráð dýr. Kjólinn fann hún hjá fatahönnuðinum Jenny Packham. 

Jafnréttismál að konur þurfi stanslaust að finna nýja kjóla

Varðandi heimsóknina segir Halla að Ísland hafi verið fyrirmynd Dana í jafnréttismálum.

„Eitt af því sem ég var stoltust af í Danmörku var hvað við vorum með jöfn kynjahlutföll í öllu sem við gerðum, hvort sem það voru á boðslistum eða þáttöku í umræðum. En það er jafnréttísmál að ræða þá staðreynd að karl getur farið í sömu kjólfötin í hverja einustu heimsókn og orðurnar passa vel við,“ segir Halla létt í bragði. 

„Eigum við ekki að segja að flestar konur fagni þeim tækifærum að tala um hversu mikla áherslu við virðumst leggja á umbúðir yfir innihald þegar það kemur að kvenleiðtogum hvar sem þær eru,“ segir Halla í viðtalinu sem má hlusta á í heild sinni hér að neðan.