Keppt var í stökki, gólfæfingum, tvíslá og jafnvægisslá og komst Thelma í úrslit á öllum áhöldum.
Thelma hóf daginn á því að tryggja sér gull í stökki þar sem hún nældi sér í 13,100 stig, eða 0,150 stigum meira en Heisha Abdullah Lockert sem hafnaði í öðru sæti.
Þetta var þó aðeins upphafið af því sem átti eftir að verða sögulegur dagur. Thelma tryggði sér einnig gull á hinum þremur áhöldunum og hafði nokkra yfirburði á tvíslá og í gólfæfingunum. Hildur Maja Guðmundsdóttir komst einnig í úrslit í gólfæfingum og hafnaði í fjórða sæti.
Thelma náði þar með besta árangri Íslands frá upphafi, en hún hafnaði einnig í öðru sæti í undankeppninni sem fram fór í gær og vann því til verðlauna í öllum þeim keppnum sem hún tók þátt í.
