Titil­vörnin hefst á sigri í stórskemmtilegum leik

Evrópumeistarar Real Madrid hófu titilvörnina á 3-1 sigri gegn Stuttgart í mjög svo fjörugum leik. 

Mörkin úr leiknum má sjá í spilaranum hér fyrir ofan. 

Fyrri hálfleikur var í meira lagi fjörugur og bæði lið hefðu hæglega getað skorað mark eða meira. Thibaut Courtois hélt heimamönnum í núllinu með nokkrum frábærum vörslum. Real Madrid fékk svo vítaspyrnu, en hún var tekin af eftir skoðun myndbandsdómara.

Staðan því markalaus í hálfleik en það breyttist strax í upphafi seinni hálfleiks.

Real Madrid brunaði upp í fyrstu sókn og tók aðeins tuttugu sekúndur í að skora, einföld stungusending á Rodrygo sem lagði boltann þvert fyrir markið á Kylian Mbappé sem lagði hann í opið netið.

Forystan hélst í rétt rúmar tuttugu mínútur en þá skoraði Deniz Undav jöfnunarmark Stuttgart eftir hornspyrnu. Lúrði á fjærstönginni og kláraði færið þegar boltinn barst.

Madrídingar svöruðu í sömu mynt og komust yfir með marki úr hornspyrnu. Luka Modric átti sendinguna sem rataði á ennið á Antonio Rudiger og þaðan í netið.

Brasilíumaðurinn Endrick skoraði svo sitt fyrsta mark fyrir félagið undir lokin. Brunaði upp í skyndisókn, ákvað að skjóta sjálfur af löngu færi fyrir utan teig frekar en að gefa boltann, sem reyndist rétt ákvörðun því hann söng í netinu og gulltryggði sigurinn.