Nýr EM hópur í glæsi­legum keppnis­búningi frá Ca­stelli Cycling

„Við erum mjög spennt fyrir þessu Evrópumeistaramóti enda er það stærsta landsliðsverkefni ársins hjá okkur,“ segir Björgvin Jónsson, framkvæmdastjóri Hjólreiðasamband Íslands (HRÍ). 

„Það sem er nýtt hjá okkur í ár er að við erum að senda fjóra stráka sem keppa í U23 flokknum en þeir hafa verið að vinnið saman sem lið á þessu tímabili. En það er kannski ekki öllum ljóst mikilvægi þess að keppa sem lið í götuhjólakeppnum. Allt í allt eru þetta sjö keppendur, fjórir í U23 og þrír í Elite hópnum.“

Keppendur í Elite flokknum eru Hafdís Sigurðardóttir frá HFA og Kristín Edda Sveinsdóttir og Kristinn Jónsson frá HFR. Keppendur í U23 flokknum eru Davíð Jónsson, Björgvin Haukur Bjarnason, Breki Gunnarsson og Daníel Freyr Steinarsson, allir frá HFR.

Fleiri þurfa að æfa í útlöndum

Götuhjólreiðar er frekar ung keppnisíþrótt hér á landi, ólíkt mörgum öðrum Evrópuþjóðum. „Keppnin fer fram í Belgíu og þar eru hjólreiðar ein vinsælasta íþróttagrein landsins og þátttakan eftir því. Einnig má nefna Ítalíu, Frakkland og Sviss sem lönd þar sem hjólreiðar eru ótrúlega vinsælar enda senda þessar þjóðir marga keppendur til leiks. Fókus okkar snýst því fyrst og fremst um að byggja upp yngri keppendur og vinna okkur upp smátt og smátt.“

Hann segir eitt helsta markmið HRÍ vera að fjölga iðkendum sem hafa hjólreiðar sem aðal íþróttagrein. „Krakkar sem hafa metnað í hjólreiðum þurfa að æfa í útlöndum til að ná árangri. Það er að aukast og við erum að taka þetta í smá skrefum. Því fleiri krakkar sem æfa erlendis og komast í lið, því betri verða þau.“

Castelli eitt virtasta hjólafatamerki heims

Eins og fyrr segir var einnig sýndur nýr og glæsilegur keppnisbúningur sem kemur frá hjólafatamerkinu Castelli Cycling. „Hjólreiðasamband Íslands gerði þriggja ára samning við hjólreiðaverslunina TRI verslun sem er með umboð fyrir þetta frábæra merki. Við erum við mjög ánægð með samninginn enda er Castelli eitt virtasta hjólreiðafatamerki heims. Þetta er ítalskt fatamerki og hefur fyrirtækið starfað mjög lengi í þessum bransa. Áður vorum við í samstarfi við lítið fatamerki frá Danmörku þannig það verður mikil hagræðing og þægindi að eiga við innlendan þjónustuaðila næstu árin.“

Réttur hjólafatnaður skiptir miklu máli og í raun meira máli en margir gera sér grein fyrir. „Það á sérstaklega við um keppnir í tímtökukeppni götuhjólreiða þar sem keppendur hjóla einir og búningurinn þarf því að kljúfa vindinn sem best. Svo þarf búningurinn auðvitað að vera þægilegur líka. Fjölmörg atvinnumannalið og landslið út um allan heim keppa í Castelli Cycling fatnaði og okkur líður mjög vel í honum.“

Stefna langt á næstu Smáþjóðarleikum

Stærsta landsliðsverkefni næsta árs eru Smáþjóðaleikarnir sem haldnir verða í Andorra. „Það er ekki keppt í hjólreiðum á öllum Smáþjóðarleikum en þar sem Andorra er mikil hjólreiðaþjóð og sannkölluð hjólaparadís verður keppt þar í maí á næsta ári. Við stefnum á að fjölmenna þangað og ætlum okkur að standa okkur vel enda henta slíkir leikar okkur mjög vel.“