Leigu­verð hefur hækkað um rúm 15 prósent milli ára

Á vef Húsnæðis- og mannvirkjastofnunar kemur fram að leita þurfi aftur til ársins 2017 til að finna viðlíka hækkanir leiguverðs á markaði. Á sama tíma og vísitala leiguverðs hefur hækkað um 15,1 prósent mældist verðbólga 6,3 prósent og vísitala íbúðaverðs hækkaði um 11 prósent.

Vísitalan byggir á nýjum leigusamningum í Leiguskrá HMS um hefðbundnar íbúðir sem eru í eigu einstaklinga og fyrirtækja sem eru rekin í hagnaðarskyni. Stuðst er við leigusamninga síðastliðna tvo mánuði og því er nýjasta gildi hennar byggt á samningum í júní og júlí. Vísitalan byggir því ekki á leigusamningum hjá óhagnaðardrifnum leigufélögum eða sveitarfélögum.

Þróun leiguvísitölunnar frá maímánuði 2023 má sjá á mynd hér að neðan.

„Vísitalan hækkaði um 8,2 prósent á ársgrundvelli í júlí umfram verðbólgu, en raunverðshækkanirnar voru nær 7 prósentum í apríl, maí og júní. Á þeim 12 árum sem sameinuð leiguverðsvísitala nær yfir hefur raunverðshækkun á ársgrundvelli aðeins verið meiri á árinu 2017, en þá var hún á bilinu 10 til 12 prósent,“ segir í tilkynningu fá vef Húsnæðis- og mannvirkjastofnunar.