Fer­tug Fríða er alls ekki hætt

Hólmfríður lagði takkaskóna á hilluna árið 2021 en hætti reyndar snarlega við og hefur spilað nokkra leiki síðan þá, en ekki skorað mark fyrr en í Mosfellsbæ í kvöld.

Hún veiktist alvarlega í janúar í fyrra og spilaði engan fótbolta það ár en tekur nú slaginn með Selfossi í Lengjudeildinni og hefur komið við sögu í níu leikjum í sumar.

Hólmfríður kom inn á 20 mínútum fyrir leikslok gegn Aftureldingu í kvöld, í stöðunni 1-1, og eftir að Katrín Ágústsdóttir hafði komið Selfossi yfir þá innsiglaði Hólmfríður 3-1 sigurinn á 82. mínútu. Þess má geta að Katrín er 21 ári yngri en Hólmfríður, sem brátt verður fertug.

Þetta var aðeins þriðji sigur Selfyssinga í sumar og liðið er enn í fallsæti, þremur stigum á eftir Grindavík sem vann 4-0 sigur á botnliði ÍR, þar sem Jada Lenise Colbert skoraði þrennu.

Dýrmætur sigur Fram í Eyjum

Fram vann afar dýrmætan 2-1 útisigur gegn ÍBV í baráttunni um að fylgja FHL upp í Bestu deildina. Framarar eru því með 25 stig líkt og Grótta í 2.-3. sæti en ÍBV og ÍA eru með 22 stig. Grótta á leik til góða við FHL á laugardaginn.

Emma Björt Arnarsdóttir og Birna Kristín Eiríksdóttir skoruðu mörk Framara í Eyjum í kvöld en Ágústa María Valtýsdóttir mark ÍBV.

Skagakonur töpuðu 3-1 fyrir HK í Kórnum og misstu því af mikilvægum stigum í baráttunni um að komast upp. Þar með er HK komið með 21 stig í 6. sæti þegar þrjár umferðir eru eftir, aðeins fjórum stigum frá 2. sætinu.