Segir Helga ekki hafa bætt ráð sitt

Vísir greindi frá því í gær að Sigríður hefði lagt til við dómsmálaráðherra að Helgi Magnús yrði leystur tímabundið frá störfum. Helgi var nýlega kærður fyrir ummæli um innflytjendur frá Mið-Austurlöndum.

Helgi tjáði Vísi að hann væri afar ósáttur við viðbrögð yfirmanns síns og spurði hvort hún væri hreinlega embætti sínu vaxin.

Sigríður lýsir aðdraganda málsins í skriflegu svari við fyrirspurn fréttastofu. Hún rifjar upp að þann 25. ágúst 2022 hafi hún veitt Helga Magnúsi áminningu skv. 21. grein laga um réttindi og skyldur starfsmanna ríkisins.

Beri að vera öðrum fyrirmynd

„Í áminningarbréfinu kom m.a. fram að það væri niðurstaða ríkissaksóknara að með tjáningu sinni, ummælum og orðfæri í opinberri umræðu, hafi háttsemi Helga Magnúsar utan starfs hans sem vararíkissaksóknari verið ósæmileg og ósamrýmanleg starfi hans og að sú háttsemi hafi varpað rýrð á störf hans sem vararíkissaksóknari, á embætti ríkissaksóknara og ákæruvaldið almennt, sbr. 14. og 21. gr. laga nr. 70/1996. Í bréfinu var lögð á það áhersla að vararíkissaksóknari er staðgengill ríkissaksóknara sem er æðsti handhafi ákæruvalds hér á landi og að honum beri því að vera öðrum ákærendum fyrirmynd í allri sinni framgöngu,“ segir Sigríður.

Helgi hafði þá tjáð sig um frétt Stöðvar 2 þar sem lögmaður hælisleitenda sagði stjórnvöld hafa sakað skjólstæðing sinn um að ljúga til um kynhneigð sína. Helgi Magnús deildi fréttinni með eftirfarandi texta:

„Auðvitað ljúga þeir. Flestir koma í von um meiri pening og betra líf. Hver lýgur sér ekki til bjargar? Þar fyrir utan er einhver skortur á hommum á Íslandi?“

Hann áréttaði svo að honum þætti vænt um samkynhneigð og hefði aldrei haft nokkuð á móti þeim. Þó mætti ekki gera ráð fyrir að hælisleitendur, sem segðust samkynhneigðir, segðu satt til um það.

Þáverandi dómsmálaráðherra gagnrýndi Helga fyrir orð sín. Hann mætti ekki rýra traust og trú almennings með framgöngu sinni á opinberum vettvangi.

Sigríður ríkissaksóknari segir að í áminningarbréfinu sem hún veitti Helga Magnúsi við það tilefni hafi honum verið gefinn kostur á að bæta ráð sitt „með því að ítreka ekki ávirðingar/háttsemi af því tagi sem lýst var í bréfinu ellegar kynni það að leiða til þess að honum yrði veitt lausn frá embætti sbr. VI. kafla laga nr. 70/1996 um réttindi og skyldur starfsmanna ríkisins.“

Hafi ekki bætt ráð sitt

„Að mati ríkissaksóknara hefur Helgi Magnús Gunnarsson ekki bætt ráð sitt í kjölfar áminningarinnar. Þvert á móti hefur hann enn og aftur með tjáningu sinni, ummælum og orðfæri í opinberri umræðu, í starfi sínu sem vararíkissaksóknari, sýnt af sér háttsemi sem er ósæmileg og ósamrýmanleg starfi hans,“ segir Sigríður.

Ríkissaksóknari hafi því vísað málefnum tengdum tjáningu Helga Magnúsar Gunnarssonar vararíkissaksóknara til dómsmálaráðherra sem sé stjórnvaldið sem skipaði hann í embætti vararíkissaksóknara og veitir lausn frá því embætti um stundarsakir skv. 26. gr. laga nr. 70/1996 um réttindi og skyldur opinberra starfsmanna, telji ráðherra efni til þess. Ríkissaksóknari hafi ekki frekari aðkomu að því máli.

Fram kom í bréfi Sigríðar til Helga Magnúsar í gær að vinnuframlag hans hefði verið afþakkað á meðan málið er í ferli.

Sigríður vísar í 26. gr. laga nr. 70/1996 þar sem segir:

„Stjórnvald er skipar í embætti veitir og lausn frá því um stundarsakir.

Rétt er að veita embættismanni lausn um stundarsakir ef hann hefur sýnt í starfi sínu óstundvísi eða aðra vanrækslu, óhlýðni við löglegt boð eða bann yfirmanns síns, vankunnáttu eða óvandvirkni í starfi, hefur ekki náð fullnægjandi árangri í starfi, sbr. meðal annars 38. gr., hefur verið ölvaður að starfi eða framkoma hans eða athafnir í því eða utan þess þykja að öðru leyti ósæmilegar, óhæfilegar eða ósamrýmanlegar því embætti sem hann gegnir.“

Þá segir Sigríður telja að rétt hafi verið staðið að tilkynningu til vararíkissaksóknara og annarra starfsmanna embættis ríkissaksóknara.