Danir ó­sáttir með mötu­neytið í Ólympíu­þorpinu: Langar raðir og kjötið kláraðist

„Maturinn er þokkalegur en við þurfum að bíða of lengi eftir honum og það er of lítið til,“ sagði Søren Simonsen, sem fer fyrir danska Ólympíuhópnum, um aðstæðurnar í mötuneytinu.

Jesper Jensen, þjálfari danska kvennalandsliðsins í handbolta, hafði sömu sögu að segja og Simonsen.

„Þú ert búinn að undirbúa þig í fjögur ár en síðan er eitt það mikilvægasta, næringin, undir pari og auðvitað er það mjög miður,“ sagði Jensen.

Þjálfarinn greindi einnig frá því að í fyrradag hefði kjötið í mötuneytinu einfaldlega klárast.

„Sem betur fer er þetta eins fyrir alla en það er synd að þetta sé ekki í lagi,“ sagði Jensen sem sagði þó að ýmsir hlutir, meðal annars samgöngur á Ólympíusvæðinu, væru að lagast. Matarmálin væru þó enn í ólestri.

Samkvæmt Simonsen hafa Danir, ásamt öðrum þjóðum, kvartað yfir ástandinu í mötuneytinu til mótshaldara. Hann sagði þó að íþróttafólkið færi þó aldrei svangt í rúmið enda væri matvörubúð í nágrenninu og þá hefðu Danir tekið með sér örbylgjuofna að heiman.