Messi hvíldur en Martínez sá um Perú

Heimsmeistararnir voru komnir áfram fyrir leikinn og það gaf Lionel Scaloni, þjálfara þeirra, tækifæri til að hvíla nokkra leikmenn. Meðal þeirra var Lionel Messi sem meiddist í sigrinum á Síle, 1-0.

Lautaro Martínez var í byrjunarliði Argentínu í fyrsta sinn í keppninni og nýtti tækifærið vel. Hann skoraði bæði mörk argentínska liðsins og hefur því skorað sjö mörk í síðustu sex landsleikjum sínum.

Sigur Argentínu hefði getað verið stærri því Leandro Parades skaut í stöng úr vítaspyrnu í seinni hálfleik.

Kanada fylgir Argentínu upp úr B-riðlinum. Kanadamenn gerðu markalaust jafntefli við Sílemenn sem var nóg til að tryggja þeim sæti í átta liða úrslitum.

Kanada fékk fjögur stig í B-riðlinum en Síle tvö. Sílemönnum mistókst að skora í leikjunum þremur í riðlakeppninni.