Lægð á leið til landsins en sól á Suður­landi í dag

Þá verður rigning norðaustan- og austantil en annars bjart með köflum og stöku skúrir. Hiti verður á bilinu fimm stigum í þokulofti við norður- og austurströndina upp í 16 stig á Suðurlandi þar sem sólar nýtur við.

Í hugleiðingum veðurfræðings Veðurstofunnar kemur svo fram að í nótt nálgist lægðin landið enn frekar og þá hvessi. Á morgun verður norðvestan hvassviðri á norðaustan- og austanverðu landinu og víða slær í storm á Austfjörðum og sunnan undir Vatnajökli.

„Það er því ráðlegt að fara að öllu með gát á þessu svæði og líklegt að ekki verði ferðafært með aftan í vagna fyrr en á laugardaginn,“ segir enn fremur í hugleiðingunum.

Nánar á vef Veðurstofunnar og um færð vega á vef Vegagerðar, umferdin.is

Veðurhorfur á landinu næstu daga

Á laugardag:

Norðvestan 5-13 m/s og þurrt og bjart veður um landið vestanvert, en rigning eða súld austantil fram eftir degi. Hiti frá 5 stigum norðaustanlands að 20 stigum syðst á landinu.

Á sunnudag:

Suðlæg átt 3-8 m/s, og víða bjartviðri en 8-13 m/s og rigning vestantil síðdegis. Hiti 10 til 24 stig, hlýjast um landið norðaustanvert.

Á mánudag:

Suðvestlæg eða breytileg átt 3-10 m/s og bjart með köflum, en rigning austast í fyrstu. Hiti 8 til 18 stig, svalast á annesjum fyrir norðan, en hlýjast á Suðausturlandi.

Á þriðjudag:

Fremur hæg austlæg átt og víða rigning sunnan- og austantil, en ananrs yfirleitt þurrt. Hiti 9 til 16 stig.

Á miðvikudag:

Útlit fyrir norðaustlæga átt með skúrum um mest allt land. Heldur svalara.