Sjáðu af hverju Davíð Smári var svona reiður út í at­vinnu­mann í liði sínu

Davíð Smári Lamude, þjálfari Vestra, var mjög reiður eftir að lið hans fékk stóran skell í gær í opnunarleik nýja gervigrassvallarins á Ísafirði. Hann hrósaði eiginlega öllu liðinu sínu nema einum manni sem fékk heldur betur að heyra það.

Þjálfarinn var nefnilega rosalega reiður út í frammistöðu markvarðarins William Eskelinen, sem færði gestunum þrjú mörk á silfurfati að mati Davíðs Smára.

„Mér fannst bara enginn munur á liðunum í fyrri hálfleik svo er náttúrulega bara einstaklingsgæði sem kosta okkur þennan leik. Menn sem voru fengnir hingað í stórt hlutverk til að hjálpa okkur að sækja stig en það hefur heldur annað gerst með það,“ sagði Davíð.

William Eskelinen er 27 ára gamall Svíi. Hann spilaði áður með Örebro og á leiki með sænskum yngri landsliðum.

„Mig langaði nú bara að gera breytingar í miðjum leik. Þetta er algjörlega óboðlegt og fyrir mann, komandi af þessu „level-i“ sem hann kemur frá. Hann verður bara að eiga það við sjálfan sig og bara sorglegt fyrir strákana sem lögðu sig alla í þennan leik,“ sagði Davíð og henti markverði sínum algjörlega undir rútuna.

En af hverju svona ósáttur? Hér fyrir neðan má sjá öll mörkin úr leiknum og þar með öll þessi hræðilegu mistök hjá umræddum Eskelinen.