Guð­mundur fram­lengir: „Hefur lyft öllu á hærra plan“

Undir stjórn Guðmundar hefur Fredericia náð mögnuðum árangri undanfarin tvö tímabil. Liðið hefur stimplað sig inn meðal toppliða danska handboltans og unnið til verðlauna bæði tímabilin. 

Á nýafstöðu tímabili var liðið svo ekki langt frá því að verða danskur meistari en þurfti að lúta í lægra haldi gegn stórliði Álaborgar í oddaleik í úrslitaeinvígi dönsku deildarinnar. 

Árangurinn tryggði Fredericia sæti í Evrópukeppni á næsta tímabili og er það í fyrsta sinn í sögu félagsins sem það mun taka þátt í slíkri keppni. Svo gæti vel verið að það verði í Meistaradeild Evrópu því Fredericia er eitt þeirra tólf liða sem hefur sótt um svokallað wildcard sæti í þeirri keppni.

Fyrri samningur Guðmundar átti að renna út eftir ár en mikil ánægja er ríkjandi beggja megin borðsins með samstarfið og því ekki úr vegi að framlengja það. 

„Það er með mikilli ánægju og stolti sem við greinum frá því að Guðmundur hafi framlengt samning sinn við félagið,“ segir Thomas Renneberg-Larsen, framkvæmdastjóri Fredericia. „Guðmundur hefur gegnt lykilhlutverki í leið okkar að toppi danska handboltans. Við erum mjög ánægð með hann vilji halda áfram sinni vinnu hér hjá okkur. 

Þegar að við réðum Guðmund sem þjálfara liðsins á sínum tíma vissum við það upp á hár að hann væri rétti maðurinn í starfið til að byggja á þeim grunni sem að Jesper Houmark hafði lagt. Allt frá sinni komu hefur Guðmundur lyft öllu, bæði liðinu og félaginu, á hærra plan.“