Sveindís: Við höfum þetta í okkar höndum og við ætlum okkur beint á EM

Sveindísi var létt eins og öðrum leikmönnum Íslands þegar lokaflautið gall í dag.

„Já það var hundrað prósent léttir þegar leiknum lauk í dag. Ekki bara út af því að við unnum heldur líka bara að koma sér í klefann því það var ógeðslega kalt. Þetta var bara frábært að vinna þennan leik við þessar aðstæður og við gerðum eins vel og við gátum við þessar aðstæður. Það var rosalega mikill vindur og það er alltaf erfitt að spila á móti vindinum. Ótrúlega sátt með þennan sigur.“

Sveindís fékk úr mjög litlu að moða í fyrri hálfleik þegar Ísland var með vindinn í fangið. Hvað gat hún fundið sér að gera þá til að hjálpa liðinu?

„Það var ótrúlega lítið að gera hjá mér. Boltinn komst varla yfir miðju út af vindinum. Þá þurfti ég bara aðeins að vinna meira í vörninni og pressa á andstæðinginn þannig að þær gætu ekki náð góðum boltum inn fyrir okkur. Ég var meira og minna bara að hlaupa, allavega í fyrri hálfleik, svo fékk ég aðeins að hlaupa á eftir boltanum í seinni hálfleik. Sem var nú aðeins skemmtilegra.“

Sveindísi fannst auðvitað leiðinlegt að fá á sig mark í lok seinni hálfleiks en það var engan bilbug að finna á liðið Íslands í seinni hálfleik.

„Ég vissi alveg að við myndum vinna þennan leik í seinni hálfleik. Við kunnum aðeins að spila með vindinum og vissi að við myndum skora. Skoruðum svo úr hornspyrnu frá Karólínu en það er okkar auðkenni og markið frá Hildi bjargaði okkur í dag.“

Það hlýtur þá að vera styrkleikamerki að brotna ekki þegar mörk koma á eins slæmum tíma og mark Austurríkis kom í dag.

„Já, við höfum verið að fá mörk á okkur en koma svo til baka. Við getum það og það er frábært. Við erum með þetta íslenska hugarfar og við gefumst aldrei upp og það er mjög gott að hafa það í farteskinu.“

Er Sveindís farið að dreyma um Sviss á næsta ári?

„Auðvitað. Strax eftir að við misstum af síðasta stórmóti þá fórum við að hugsa um að komast á EM og við erum einu skrefi nær því og ég er bara spennt fyrir næsta glugga. Ég er spennt að spila við Þýskaland og Pólland sem eru mikilvægir leikir. Við höfum þetta í okkar höndum og við ætlum okkur beint á EM.

Hvaða möguleika er að finna í næsta glugga fyrir Ísland?

„Bara vinna. Það er það sem við ætlum að gera. Við erum í bílstjórasætinu. Pólland hafa staðið sig vel, komist yfir í báðum leikjunum við Þýskaland en hafa brotnað þannig að við sjáum veikleika þar sem við getum nýtt okkur. Við unnum þær í fyrri leiknum og ef við vinnum þær næst og gerum vel gegn Þýskalandi, náum kannski einhverju úr þeim leik þá erum við bara á leiðinni beint á EM.“