Vann sitt fyrsta PGA-mót með pabba sinn sem kylfusvein

MacIntyre var með fjögurra högga forystu fyrir lokahringinn í gær en hún hvarf fljótlega. Mikil spenna var því á lokahringnum en MacIntyre náði að landa sigrinum. Hann lék samtals á sextán höggum undir pari. Bandaríkjamaðurinn Ben Griffin varð annar á fimmtán höggum undir pari.

MacIntyre fékk góðan stuðning á lokasprettinum á Opna kanadíska því faðir hans, Robert MacIntyre eldri, var kylfusveinn hjá stráknum.

„Ég vildi vinna þetta fyrir pabba minn, manninn sem kenndi mér golfið, og ég trúi ekki að ég hafi gert það með hann sem kylfusvein. Þetta hefur svo mikla þýðingu fyrir mig og fjölskyldu mína, kærustuna mína og liðið mitt,“ sagði MacIntyre.

Pabbi hans var einnig sáttur. Hann er ekki vanur kylfusveinn en hann starfar sem vallarstjóri á golfvelli.

„Þetta var ótrúlegt. Ég er vallarstjóri, ekki kylfusveinn. Síðasta laugardag sat ég á sófanum heima og hugsaði hvort ég gæti brugðið mér frá því ég væri upptekinn í vinnu. Klukkan átta næsta morgun er ég kominn upp í flugvél á leið hingað og vá,“ sagði MacIntyre eldri.

Með sigrinum á Opna kanadíska tryggði sonur hans sér þátttökurétt á Opna bandaríska meistaramótinu sem hefst 13. júní næstkomandi.