Sá sem át ekkert nema McDonalds í mánuð er fallinn frá

Bandaríkjamaðurinn fæddist 7. nóvember 1970 í Vestur-Virginíu og beindi sjónum sínum að leikritaskrifum áður en hann skapaði vefseríuna I Bet You Will árið 2002 þar sem fólk var hvatt til að taka þátt í áskorunum gegn peningagreiðslum.

Meðal áskorana í seríunni var til dæmis að borða fulla krukku af majónesi fyrir þrjátíu þúsund krónur. Svo fór að MTV keypti af honum seríuna að því er fram kemur í umfjöllun Sky.

Frægðarsól hans skein skærast árið 2004 þegar heimildarmyndin Super Size Me fór á flug. Þar var áskorun hans að borða aðeins McDonald's hamborgara í þrjátíu daga til að vekja athygli á offituvandanum í Bandaríkjunum.

Myndin í heild má sjá að neðan.

Hann borðaði að meðaltali fimm þúsund kaloríur á dag, valdi alltaf stærstu mögulegu máltíð í boði og hreyfði sig minna en venjulega, í samræmi við meðalhreyfingu meðal Bandaríkjamanns. Niðurstaðan var sú að hann bætti á sig rúmlega ellefu kílóum og sagðist auk þess finna fyrir einkennum þunglyndis og óþægindum í lifur.

Myndin sló í gegn og var tilnefnd til Óskarsverðlauna í flokki heimildarmynda. Hún varð einnig til þess að McDonald's hætti að bjóða upp á möguleikann á að kaupa „super size“ máltíðina, þá stærstu í boði.

Spurlock var þó ekki laus við gagnrýni vegna myndarinnar. Sett var spurningarmerki við niðurstöðurnar þar sem Spurlock neitaði að deila skrásetningu máltíða sinna. Þá opnaði hann sig um mikla áfengisneyslu sína árið 2017 sem heimildarmyndagerðarfólk sagði að gæti útskýrt andlega vanheilsu hans og vandræði með lifur.

Spurlock kom til Íslands árið 2011 til að kynna heimildarmynd sína The Greatest Movie Ever Sold sem fjallaði um vöruinnsetningar í bandarískum afþreyingariðnaði.

Myndina í heild má sjá að neðan.