Bréf Eggerts kom flatt upp á bæjar­stjórnar­menn

Vísir greindi frá því í morgun að í bréfi Eggerts sé það fordæmt að til standi að reisa mölunarverksmiðja í næsta nágrenni við matvælaframleiðslu sem First Water ætlar að ráðast í. Við Laxabraut nánar tiltekið.

„Þar sem við erum að byggja upp hágæða matvælaframleiðslu á Laxabraut þá teljum við óásættanlegt að í sömu götu standi til að byggja mölunarverksmiðju sem fer alls ekki saman við matvælaframleiðslu né heldur að bygging [sem] hafnar á því svæði sem við erum að sækja jarðsjó,“ segir í bréfinu.

Grétar Ingi segist ekki vita hvort þetta setji strik í reikninginn.

“En auðvitað er maður hissa. Þetta verkefni teygir sig aftur um þrjú ár, það hefur verið í skoðun og bígerð. Skipulags- og umhverfisnefnd auglýstu skipulagstillöguna og kölluðu eftir athugasemdum. Engar slíkar bárust frá First Water.“

Sleginn vegna bréfsins

Grétar Ingi segist ekki hafa haft svigrúm til að fara ítarlega yfir bréf Eggerts, það hafi borist skömmu fyrir lokun í gær.

„En auðvitað var maður sleginn þegar maður sá þetta bréf,“ segir Grétar Ingi sem vill meðal annars gera athugasemd við tímasetninguna. Sem er fjórum dögum áður en íbúakosningar hefjast. En þeim lýkur 1. júní, samhliða forsetakosningum.

„Ég var sleginn. Mögulega hefði verið hægt að koma í veg fyrir þessar áhyggjur. Auðvitað vill sveitarfélagið ekki setja önnur verkefni í uppnám en ég hef ekki haft forsetndur til að meta hvort þær áhyggjur sem Eggert viðrar eru á rökum reistar. Til þessa hef ég staðið í þeirri trú að þessar framkvæmdir myndu ekki hafa áhrif á landeldið. Mönnum hefur gefist kostur á að setja inn athugasemdir í lögformlegu ferli.“

Sérkennileg tímasetning

Grétar segir stefnu meirihlutans þá að vega og meta gögn af hlutleysi. Þau séu íbúar eins og aðrir en hafi hvergi talað fyrir og hvergi gegn þessum áformum. „Við treystum íbúum til að vega og meta þær upplýsingar sem fyrir liggja.“

Hann segist jafnframt vita til þess að forsvarsmenn landeldisins hafa átt í samtali við kjörna fulltrúa og þessar áhyggjur hafa aldrei komið fram á þeim fundum. 

„Já, ég er hissa að þetta skuli vera að koma fram núna. Þetta er skrítin tímasetning, svo ekki sé meira sagt,“ segir Grétar Ingi sem segist nú ætla að gefa sér tíma til að fara nánar yfir bréfið frá Eggerti. Hann segist í fljótu bragði ekki sjá að þar sé verið að setja bæjarstjórninni neina afarkosti en vissulega sé þetta óþægilegt.