Tekist á í Stúdenta­ráði: „Furðu­legasti fundur sem ég hef mætt á“

„Röskva telur þessi vinnubrögð bæði ólýðræðisleg og ósanngjörn enda brjóta þau ekki einungis gegn lýðræðisvenju innan SHÍ heldur einnig verklagsreglum ráðsins sem samþykktar voru einróma af fulltrúum beggja hreyfinga á stúdentaráðsfundi í desember 2023,“ segir í yfirlýsingu frá Röskvu sem send var á fréttastofu í kjölfar fundarins í gærkvöldi.

Auk þess brjóti Vaka „gegn lýðræðisvenjum“ SHÍ þar sem forsætum hefur áður verið úthlutað í hlutfalli við niðurstöðu kosninga. Þannig hafi meirihluti ekki alltaf haft forsæti í öllum nefndum heldur úthlutað minnihluta forsæti í einhverjum nefndum.

Ekki sanngjarnt

„Röskva telur þessa framgöngu Vöku vera misbeitingu á valdi og vanvirðingu gagnvart störfum Stúdentaráðs. Hún gengur þvert gegn hagsmunum stúdenta og þeim sanngjörnu og lýðræðislegu vinnubrögðum sem Röskva hefur haft að leiðarljósi í forystu Stúdentaráðs,“ segir í yfirlýsingu Röskvu þar sem þess er krafist að fulltrúar Vöku endurskoði þessi ákvörðun.

„Okkur þykir leitt að hefja starfsárið á svona ágreining en þykir verra ef þessi vinnubrögð endurspegla vinnu meirihlutans á komandi starfsári SHÍ. Við í Röskvu vonum að Vaka finni sóma sinn í að halda áfram því góða samstarfi milli fylkinga sem hefur verið við lýði á tímum Röskvu í meirihluta undanfarin ár og víki frá.“

Júlíus Viggó Ólafsson, oddviti Vöku, vísar þessari gagnrýni Röskvu á bug. Vaka vann meirihluta í kosningum til stúdentaráðs fyrr í þessum mánuði og hafði ekki unnið meirihluta í sjö ár.

„Hér fær umboð nýr meirihluti í fulltrúalýðræði og þetta eru fullkomlega eðlilegar breytingar. Það eru til helminga í öllum nefndum fulltrúar frá Vöku og Röskvu. Það er ekki verið að henda neinum út,“ segir Júlíus og að samkvæmt lögum megi skipa í nefndir eins og stúdentaráð kjósi að gera það.

„En vegna þess að við erum að taka við eftir svo langan tíma viljum vil bera ábyrgð á öllu því góða og öllu því slæma sem gerist í stúdentaráði og viljum því fara með formennsku í öllum nefndum.“

Leikþáttur Röskvu óþarfi

„Hvað varðar þetta heiðursmannasamkomulag þá kannast ég ekki við það,“ segir hann og að sem dæmi hafi Vaka hlotið meirihluta atkvæða á Menntavísindasviði í fyrra en ekki fengið forsæti í sviðsráði Menntavísindasviðs. Vaka hafi verið farið með formennsku í einhverjum nefndum en ekki á þeim sviðum þar sem þau hlutu meirihlutakosningu.

„Ég gef lítið fyrir svona vinnubrögð. Röskva lagði miklu meiri áherslu á það á fundinum í gær að bóka og standa upp og ganga út af fundinum í von um að það myndi gera hann ólöglegan. Sem það gerði ekki. Við fylgjum lögum í því sem við gerum, en þau eru uppteknari af þessu en að mæta í vinnuna. Til að gera það sem þau fengu umboð til að gera, sem við erum að reyna að gera. Sem er að sinna hagsmunabaráttu stúdenta og ekki vera í setuverkföllum og leikþáttum eins og við urðum vitni að gær.“

Þarf að festa verklag í lög

Um yfirlýsingar Röskvu um gott samstarf segir hann það ekki hafa verið eins gott á síðasta ári og Röskva vill meina í sinni yfirlýsingu.

„Staðreyndin er sú að nú erum við að taka við meirihluta og við viljum bera ábyrgð á öllu sem gerist í Stúdentaráði. Við hefðum samkvæmt lögum getað tekið allar stöður í nefndum en gerðum það ekki. Við skoðuðum að taka aukinn meirihluta í þeim nefndum sem skipta okkur miklu máli eins og umhverfis- og samgöngunefnd, en ákváðum svo að gera það ekki eftir ígrundun. Eftir að fulltrúar Röskvu gengu af fundinum í gær kusum við samt sem áður fulltrúa þeirra í helming sæta í nefndunum.“

Hvað varðar verklagsreglurnar segir Júlíus Viggó það augljóst að það standist ekki skoðun að verklagsreglur sem síðasti meirihluti setti sér gildi fyrir það sem nú starfar.

„Svona reglur eru eitthvað sem þarf að festa í lög með auknum meirihluta,“ segir hann og að það sé fullt tilefni til að taka þetta verklag til skoðunar og jafnvel að festa og skýra það betur í lögum.

„Mér finnst fyrst og fremst skipta máli að það sé farið eftir lögum. Þannig það er eitthvað sem mér þætti mikilvægt að skoða. Þannig þetta sé skýrt í lögum en ekki í einhverjum verklagsreglum, þar sem þetta á ekki heima. En til þess að það sé hægt að gera það þá þurfa Röskvuliðar að mæta til vinnu.“

Júlíus Viggó segir Vökuliða tilbúna til samstarfs við Röskvu og vonar að það samstarfið geti gengið vel í vetur.

„Ég veit ekki hvernig það verður. Ég hef mætt á Stúdentaráðsfundi í rúmlega ár og þetta er einhver furðulegasti fundur sem ég hef mætt á. Ég var algjörlega óundirbúinn undir það hvaða tilþrif fólk var tilbúið að fara í. Viljinn er allur okkar megin í að halda áfram að vinna að hagsmunum stúdenta.“