„Þor­valdur hefur ekki farið í felur“

„Mér finnst þetta hafa verið fínt hjá honum. Hann stígur inn í storminn í kringum Ísraels-leikinn og Alberts-málið. Hann hefur gert nokkuð vel og ekki farið í felur,“ segir Aron Guðmundsson íþróttafréttamaður í hlaðvarpinu Besta sætið sem er hlaðvarp íþróttadeildar.

Forverar Þorvalds í starfi áttu það til að fara í felur og svara fyrirspurnum fjölmiðla seint og illa.

„Við skulum taka inn í reikninginn að þegar ég var að reyna að ná í hann fyrir brottför út þá var það sama morgun og niðurstaðan í máli Alberts er kærð. Þá er hann eðlilega á fundum að ræða þessi mál og svo á leið út,“ bætir Valur Páll Eiríksson við.

„Þetta fer vel af stað hvað varðar að svara og mæta í viðtöl. Hann fór beint í viðtal við Stefán Árna úti þegar hann mætti þangað. Ég tek hatt minn ofan fyrir því hvernig hann hefur byrjað í þessum málum. Vonandi heldur þetta svona áfram.“

Umræðan um Þorvald hefst eftir rúmar nítján mínútur af þættinum. Besta sætið er aðgengilegt á Vísi sem og á öllum hlaðvarpsveitum.