Kvöld­fréttir Stöðvar 2

Benedikt Ófeigsson jarðeðlisfræðingur fer yfir stöðu eldgossins á Reykjanesskaga í beinni útsendingu. Enn er góður kraftur í eldgosinu en landris hefur stöðvast.

Forseti Landssamtaka íslenskra stúdenta segir frumvarp háskólamálaráðherra um Menntasjóð námsmanna vera vonbrigði. Það þrengi að möguleikum þess fólks, sem flokkað er sem ótryggir lántakar, til að stunda nám og þá sé of skammt gengið í breytingum á styrkjafyrirkomulagi. Rætt verður við hann í kvöldfréttum.

Við kíkjum á Bessastaði þar sem forseti lýðveldisins tók á móti fulltrúum Félags áhugafólks um Downs heilkennið í morgun. Dagur heilkennisins er haldinn hátíðlegur um allan heim í dag og tók forsetinn á móti nýju pari af mislitum sokkum í tilefni dagsins. Þá verðum við í beinni útsendingu frá Gamla Bíói, þar sem Hlustendaverðlaunin fara fram í kvöld.

Þetta og margt fleira í kvöldfréttum Stöðvar 2 klukkan hálf sjö.