Hús­næðis­leit í ráð­húsi og tveir reknir í tengslum við spillingar­málið

Líkt og Vísir greindi frá í gær var lögregluleit framkvæmd í húsakynnum spænska knattspyrnusambandsins og fyrrum formanns þess, Luis Rubiales. Alls var leit gerð í ellefu húsnæðum í gær, þeirra á meðal húsakynnum knattspyrnusambandsins í Madríd og heimili Rubiales í Granada. 

Málið hefur verið til rannsóknar hjá ríkislögreglu Spánar í samvinnu við Europol síðan þann 30. maí 2022 þegar formleg kæra barst á hendur sambandsins. Sjö fyrirskipaðar handtökur liggja fyrir og aðrir fimm verða teknir til yfirheyrslu.

Tveimur sagt upp og formaður fékk ekki kjör

Í dag var Pedro Gonzalez Segura, yfirlögfræðingi, og Jose Javier Jimenez, mannauðsstjóra spænska knattspyrnusambandsins vikið úr starfi. 

Bráðabirgðaformaðurinn Pedro Rocha, sem tók við eftir að Luis Rubiales braut af sér kynferðislega og lét af störfum, ætlaði að sækjast eftir kjöri til formanns á fundi sambandsins í gær. Búið var að kalla stjórnina til atvkæðagreiðslu en fundinum var frestað þegar lögreglan mætti á staðinn. 

Spillingin teygir sig víða

Greint var frá því í gær að málið snerist um úrslitaleik spænska ofurbikarsins, sem var færður til Sádi-Arabíu. Í dag greinir Reuters frá því að málið teygi anga sína víðar og snúi meðal annars að uppbyggingu á La Cartuja leikvanginum í Sevilla. 

Farið var í framkvæmdir á leikvanginum stuttu eftir að Luis Rubiales tók við árið 2018. Þá gekk hann frá fjölda samninga við sjálfstjórnarríkisstjórnina í Andalúsíu. Þess efnis, meðal annars, að úrslitaleikur Copa del Rey og heimaleikir spænsku landsliðanna færu fram á nýendurbætta  La Cartuja leikvanginum.

Samkvæmt heimasíðu ríkisstjórnarinnar hefur hún greitt spænska knattspyrnusambandinu rúmlega átta milljónir evra síðan 2020 fyrir þeirra hlut í kostnaði við framkvæmdir. 

Húsnæðisleit í ráðhúsinu og Rubiales fór í frí

Lögreglan framkvæmdi húsnæðisleit í ráðhúsi ríkisstjórnarinnar í Sevilla, Andalúsíu í dag. Fulltrúar ríkisstjórnarinnar hafa stigið fram og segja hana samvinnufúsa í rannsókninni. 

Luis Rubiales er ekki eins samvinnufús, hann hefur vissulega neitað sök í málinu en til öryggis fluttist hann tímabundið til Dóminíska lýðveldisins, sem framselur flóttamönnum og föngum ekki til Spánar.