Vill sam­skipti Þór­dísar við Bankasýsluna upp á borð

„Ég held að stóra fréttin sé að Bankasýslan hafi ekki verið upplýst um gang mála. Það var viðtal við fjármálaráðherra sem átti sér stað fyrir einum og hálfum mánuði síðan þar sem að kom fram að hún hefði frétt af þessum vendingum,“ segir hún.

„Maður veltir auðvitað fyrir sér hvers konar verklag á sér stað þegar það er vitað að Landsbankinn hefur áhuga þarna á, og Bankasýslan bregst ekki við, óskar ekki eftir upplýsingum. Það liggur líka fyrir að fjármálaráðherra hefur eftirlitsskyldu með Bankasýslunni og hefði getað beðið Bankasýsluna um að spyrjast fyrir um málið. Það svolítið seint gripið inn í núna eftir á.“

Kvika banki greindi frá því síðdegis á sunnudag að Landsbankinn hygðist kaupa tryggingafélagið TM. Í kjölfarið gaf Þórdís Kolbrún Reykfjörð Gylfadóttir fjármálaráðherra það út að hún myndi ekki samþykkja kaupin, nema að söluferli ríkisins á Landsbankanum myndi hefjast samhliða. 

Þórdís hafði áður gefið út að hún væri ekki spennt fyrir kaupunum, en þá lágu þau ekki fyrir.

Kristrún segir ljóst að stjórnvöld séu að reyna að bregðast við fyrirhuguðum kaupum alltof seint.

„Það liggur alveg fyrir að hlutirnir gerast ekki af sjálfu sér, eða þeir eiga ekki að gerast af sjálfu sér. Það virðist ríkja ákveðið stjórnleysi um þetta mál. Fjármálaráðherra ber ábyrgð á að fylgjast með eignarhaldi ríkisins í fjármálafyrirtækjum og hefur þar Bankasýsluna, og fólk er að koma að þessu máli alltof seint,“ segir Kristrún.

„Að mínu mati er þetta mál í heild sinni ákveðið frumhlaup, sama hverjum er að kenna. Það hefur aldrei verið tekin almennileg langtíma yfirreið eða sýn á það hvernig banki Landsbankinn eigi að vera. Það skiptir lykilmáli upp á framtíðina. Það kann vel að vera að það sé framtíð í því að reka fyrirtæki með þeim hætti sem bankastjórinn sér núna fyrir sér, en sú umræða hefur ekki átt sér stað á hinum pólitíska vettvangi, hún hefur ekki átt sér stað innan þessarar ríkisstjórnar, og þetta er ekki í takt við eigendastefnuna. Þetta er ákveðið frumhlaup og sýnir að það er ákveðið stjórnleysi til staðar.“

Þá nefnir Kristrún að ríkisstjórnin hafi gefið út að Bankasýslan yrði lögð niður. Kristrún leggur til að samskipti fjármálaráðherra við Bankasýslunnar verði gefin upp, en sjálfa grunar hana að samskiptin hafi verið lítil.

„Svo má líka nefna að það átti að vera búið að leggja niður þessa Banksýslu. Það þarf að komast til botns í því hvers konar samskipti hafa verið á milli fjármálaráðherra og Bankasýslu undanfarin tvö ár, eða frá því að þessi fjármálaráðherra tók við. Það sem ég hef á tilfinningunni er að það hafi ekki verið mikil samskipti þarna á milli,“ segir Kristrún.

Þórdís tók við sem fjármálaráðherra af Bjarna Benediktssyni sem steig til hliðar í október síðastliðnum eftir álit Umboðsmanns Alþingis á framkvæmdinni á sölu ríkisins á hlut í Íslandsbanka.

Hún segir að fólk hafi ekki búist við því Bankasýslan yrði í eins mikilli virkni og hún hefur verið, og nefnir Íslandsbankamálið sem dæmi.

Er þetta eitt allsherjarklúður?

„Þetta lítur ekki vel út.“