Geggjuð í karókí og býr yfir miklum sann­færingar­krafti

Þórildur segist hafa nóg fyrir stafni þessa stundina. Ef hún er ekki að sinna fjölskyldunni, í vinnunni eða að taka upp hlaðvarpsþætti skoðar hún umfjallanir um veitingastaði í New York á samfélagsmiðlinum TikTok þar sem hún er á leiðinni þangað í vor.

„Mjög spennt að heimsækja þessa uppáhaldsborg þar sem ég bjó fyrir 15 árum,“ segir Þórhildur.

Þórhildur sýnir lesendum Vísis hina hliðina þessa vikuna.

Fullt nafn? Þórhildur Þorkelsdóttir

Aldur? 33 ára.

Starf? Framkvæmdastjóri Brú Strategy og hlaðvarpskona.

Fjölskyldan? Með hverjum býrðu? Bý með Hjalta Harðarsyni forstöðumanni markaðsdeildar Landsbankans og syni okkar Hilmi Hjaltasyni sem er fimm ára.

Hvað er á döfinni? Það er nóg um að vera í vinnunni hjá Brú þar sem við aðstoðum stór og smá fyrirtæki að ná árangri í stefnumótun, markaðsmálum og almannatengslum. Verkefnin þar eru fjölbreytt og skemmtileg þar sem ég læri eitthvað nýtt á hverjum degi. Svo er eitt mjög spennandi verkefni fram undan í tengslum við Eftirmál, hlaðvarpið sem ég held úti ásamt Nadine Guðrúnu Yaghi vinkonu minni.

Þín mesta gæfa í lífinu? Hljómar kannski eins og klisja en sönn er hún - að eignast strákinn minn er það besta sem hefur komið fyrir mig. Móðurhlutverkið breytti mér mikið á góðan hátt og kenndi mér að hversdagurinn er það besta við lífið.

Hvernig hugarðu að heilsunni? Ég reyni að borða hollan mat og hreyfa mig reglulega. Ég er ekki mikið fyrir boð og bönn svo gullni meðalvegurinn er mín mantra í þessu. Svo er ekki síður mikilvægt að huga að andlegu hliðinni. Self care og góður svefn er lykilatriði þar en svo ætti ríkið eiginlega að niðurgreiða sólarlandaferðir fyrir landann yfir þessa dimmustu mánuði, held það myndi skila sér margfalt til baka í almennri lífshamingju og framlegð.

Fallegasti staður á landinu? Uppsveitir Árnessýslu á sumarnótt eru sá fallegasti, Kerlingarfjöll og Þjórsárdalur.

En í heiminum? Í heiminum eru þeir ansi margir en ég kolféll fyrir Douro-dal í Portúgal síðasta sumar.

Hvað gerirðu til að endurhlaða batteríin? Göngutúr með gott hlaðvarp í eyrum er allra meina bót, lásuð það fyrst hér. Ég núllstilli mig með því að fara í sund, gufu og kaldan pott en eftir það getur maður tekist á við hvað sem er. 

Mín hugleiðsla er líka að lesa bækur, það getur verið mjög þakklát pása frá daglegu áreiti og snjalltækjum. 

Svo elska ég að fá mér heiðarlegan lúr! Gefðu mér 20 mín og ég mæti endurnærð til leiks.

Hvað hefur mótað þig mest? Að þurfa að standa á eigin fótum frá unga aldri. Kenndi mér að redda mér og ganga í verkin.

Hvað ertu að hámhorfa á? Ég er að horfa á The Morning Show á Apple+ og nýjustu seríuna af Love is blind á Netflix. Annars horfum við frekar mikið á sjónvarp á mínu heimili og ég hef nördalega mikinn áhuga á íslenskri dagskrárgerð.

Uppskrift að drauma sunnudegi? Byrjum daginn á að sofa út sem hittir í mark hjá B-týpunni mér. Bröns og jafnvel mímósur með vinum einhversstaðar miðsvæðis í hádeginu og göngutúr um bæinn með stoppi á skemmtilegri listasýningu eða í Kolaportinu, sem er í uppáhaldi hjá stráknum mínum. Sund seinni partinn og góður comfort food um kvöldið sem maðurinn minn eldar.

Hvað viltu upplifa áður en þú deyrð? Leyndó.

Býrðu yfir einhverjum leyndum hæfileikum? Ég er geggjuð í karókí og að sögn hef ég mikinn sannfæringakraft.

Hvaða tungumál talarðu? Íslensku, ensku og get reddað mér á dönsku og spænsku.

Besta heilræði sem þú hefur fengið? 

Hver er sinnar eigin gæfu smiður og að vera ekki að velta mér upp úr liðnum hlutum.

Hvað er það fyrsta sem þú gerir þú vaknar? Snooza.

En það síðasta sem þú gerir áður en þú ferð að sofa? Loka augunum. Slekk á podcastinu/hljóðbókinni eða sjónvarpinu.

Fyrsti kossinn? Á sveitaballi í níunda bekk.

Hvað stendur í síðustu FB-skilaboðunum sem þú sendir? Hvar er þessi skilalykill? Finn hann ekki.

Hælar eða strigaskór? Erfitt val en hugsa að hælarnir hafi þetta.

Hvenær fórstu að gráta síðast og af hverju? Ég hágrét yfir þáttunum One Day á Netflix. Úff.

Uppáhalds staðurinn á heimilinu? Stofan, hjarta heimilisins á mínum bæ.

Hvaða lag kemur þér alltaf í gírinn? David - Gus Gus.

Ertu A eða B týpa? Ég gæti ekki verið meiri B-týpa. Ég óska þess stundum að vera meiri A- týpa þar sem ég er í sífelldri baráttu við samfélagslegan takt sem er ekki búin til fyrir fólk með mína líkamsklukku. 

Ég kem alltaf mestu í verk á kvöldin enda langbesti tími dagsins.

Ertu með einhvern bucket-lista? Að vera almennt hamingjusöm í gegnum lífið og setja ferðalög í forgang. Læra allskonar nýtt. Held alltaf áfram að bæta við þennan lista.

Hin hliðin er vikulegur viðstalsliður hjá Lífinu á Vísi þar sem við fáum að kynnast einstaklingum úr öllum kimum þjóðfélagsins. Ábendingar um viðmælendur má senda á svavam@stod2.is.