Navalní sagður hafa dáið í fangelsi

Í frétt RIA fréttaveitunnar, sem er í eigu rússneska ríkisins, segir að Navalní hafi misst meðvitund í morgun eftir göngutúr. Endurlífgunartilraunir hafi verið reyndar en þær hafi ekki borið árangur. Í fréttinni segir að dánarorsök liggi ekki fyrir enn.

Samstarfsmenn Navalnís og ráðgjafar hans hafa ekki staðfest andlát hans enn. Talskona hans segist engar upplýsingar hafa fengið, aðrar en þær sem birtar hafi verið af fangelsismálayfirvöldum í Rússlandi. Lögmenn hans eru sagðir á leið í fangelsið þar sem hann var í haldi en það er mjög einangrað í Síberíu.

Leoníd Vólkov, starfsmannastjóri Navalnís, segir dauða hans ekki hafa verið staðfestan. Sé Navalní látinn sé staðreyndin sú að hann hafi verið myrtur af Pútín. Ekkert annað komi til greina.

Navalní var 47 ára gamall en hann var síðasta sumar dæmdur í nítján ára fangelsi fyrir að stofna og fjármagna öfgasamtök. Hann hafði einnig reynt að bjóða sig fram til forseta gegn Pútín en var meinað að gera það.

Navalní mætti í dómsal í gær í gegnum fjarvistabúnað.

Áðurnefnd samtök unnu að því að opinbera spillingu embættismanna í Rússlandi. Forsvarsmenn samtakanna skipulögðu einnig mótmæli í Rússlandi og héldu utan um gagnagrunn sem átti að gera kjósendurum auðveldara að finna frambjóðendur í kosningum sem áttu möguleika á að fella frambjóðendur flokks Pútíns.

Sjá einnig: Kreml vængstífir samtök Navalní

Hann hefur setið í fangelsi frá 2021 þegar hann hlaut tveggja og hálfs árs dóm fyrir að rjúfa skilorð vegna dóms frá 2014, sem Mannréttindadómstóll Evrópu hefur sagt gerræðislegan.

Sjá einnig: Refsing Naval­nís þyngd um ní­tján ár

Ástæða þess að hann braut skilorðið var þó sú að eitrað hafði verið fyrir honum og hann lá við dauðans dyr á sjúkrahúsi í Þýskalandi. Navalní sakar Vladimír Pútin, forseta Rússlands um að bera ábyrgð á eitruninni en notast var við taugaeitrið Novichok, sem einnig var notað til að eitra fyrir fyrrverandi njósnaranum Sergei Skripal og dóttur hans.

Joe Biden, forseti Bandaríkjanna, sagði um sumarið 2021 að afleiðingarnar yrðu alvarlegar fyrir Rússland, ef Navalní myndi deyja í fangelsi. Hann sagðist hafa varað Pútín við því en tók ekki fram hvort hann ætlaði sér að grípa til einhverra aðgerða.

Hér má sjá hluta úr viðtali Christine Amanpour við Navalny árið 2020 þar sem hann sagði af hverju hann vildi snúa aftur til Rússlands, eftir að eitrað var fyrir honum.

Hvarf í fangelsi

Undir lok síðasta árs virtist sem Navalní hefði týnst í fangelsi. Samstarfsmenn hans og lögmenn náðu ekki sambandi við hann eftir að hann birtist ekki í dómsal, í gegnum fjarskiptabúnað, tvo daga í röð.

Seinna meir kom í ljós að hann hafði verið fluttur í nýja fanganýlendu í Síberíu.

Sjá einnig: Naval­ní heilsast vel og sendir há­tíðar­kveðjur

Dmitrí Peskóv, talsmaður Pútíns, hefur tjáð sig um andlát Navalnís. Í samtali við blaðamenn í morgun sagði hann ekki ljóst af hverju Navalní hefði dáið.