Jakob Svavar og Skarpur sigruðu fyrsta mót Meistara­deildar Líflands 2024

Aðstæður voru til fyrirmyndar á staðnum og vel tekið á móti knöpum og áhorfendum. Veisluþjónusta Suðurlands var með glæsilegt hlaðborð og aðrar veitingar í boði sem vakti lukku gesta ásamt því að Fasteignasalarnir Gulla Jóna og Garðar buðu gestum frítt í stúkuna.

Það var klárt allt frá fyrstu sýningu að knapar og hestar komu vel undirbúnir til leiks og ekki að sjá að tímabilið sé bara rétt að byrja. Frábærar sýningar litu dagsins ljós en að lokinni forkeppni voru það sigurvegararnir frá því í fyrra þau Aðalheiður Anna og Flóvent frá Breiðstöðum sem leiddu með nokkrum yfirburðum með einkunnina 7.87. 

Þar á eftir komu Jakob Svavar og Skarpur frá Kýrholti með 7.5 og í því þriðja voru þau Ragnhildur og Úlfur frá Mosfellsbæ og Glódís og Breki frá Austurási jöfn með 7.37. Jóhanna Margrét og Kormákur frá Kvistum og Gústaf Ásgeir og Assa frá Miðhúsum með riðu sig einnig inn í A-úrslit sem voru jöfn og spennandi allt til loka. Eftir brokkið leiddu Ragnhildur og Úlfur en eftir fetið voru það Gústaf og Aðalheiður sem voru jöfn. Að lokum voru það svo Jakob Svavar Sigurðsson og Skarpur frá Kýrholti sem stóðu uppi sem sigurvegarar og hlutu einkunnina 7.80 og sigruðu fyrsta mót Meistaradeildar Líflands 2024.

Rétt á hæla hans kom Aðalheiður og Flóvent, en smá hnökrar í stökk sýningunni voru þeim dýr en þau höfnuðu önnur með einkunnina 7.70. Í þriðja sæti voru þau Glódís Rún og Breki frá Austurási með 7.57. Á meðal keppenda kvöldsins var eitt uppboðssæti en fyrir hvert mót er hægt að kaupa sig inn í keppnina og hæsta boði tekið. Að þessu sinni var það Birta Ingadóttir með hryssuna Hrönn frá Torfastöðum. Þau blönduðu sér ekki í toppbaráttuna að þessu sinni en sýndu flotta takta í sinni sýningu.

Liðakeppni kvöldsins sigraði lið Hestvit/Árbakka með 53 stig en liðið var með alla sína þrjá knapa í úrslitum, Glódísi Rún, Gústaf Ásgeir og Jóhönnu Margréti. Jakob Svavar sem leiðir einstaklingskeppnina með 12 stig.

Við í stjórn meistaradeildar erum ánægð með frábærar móttökur á fyrsta móti ársins og óskum knöpum til hamingju með árangurinn. Sjáumst næst 8. febrúar í HorseDay höllinni Ingólfshvoli þegar keppt verður í slaktaumatölti. Slaktaumatölt í Meistaradeildinni hefur verið vaxandi grein og er keppnin orðin gríðarlega sterk þar sem margir af bestu tölturum landsins etja kappi. Í fyrra voru það þau Aðalheiður Anna Guðjónsdóttir og Flóvent frá Breiðstöðum sem sigruðu og má búast við því að þau stefni á að endurtaka leikinn. En það kemur í ljós á þriðjudaginn hverjir keppa um titilinn þegar dregið verður í rásröð í beinni útsendingu á Alendis.

Horses of Iceland ætla að þessu sinni að bjóða í gestum frítt í HorseDay höllina, Veisluþjónusta Suðurlands verður á staðnum með glæsilegt hlaðborð ásamt öðrum veitingum. Sé pantað fyrir fram á hlaðborðið fylgir í kaupbæti frátekið sæti á besta stað í stúkunni. Pantanir fara fram hér en nánari upplýsingar má senda á info@ingolfshvoll.is

​Sjáumst í HorseDay höllinni fimmtudaginn 8. febrúar.