Rask á flugi í fyrra­málið vegna veðurs

Gul viðvörun tekur gildi á suðvesturhorninu klukkan fjögur í fyrramálið og stendur yfir til klukkan átta. Á vef Isavia kemur fram að einhverjum flugferðum, bæði brottförum og komum, hefur nú verið seinkað. 

Birgir Olgeirsson upplýsingafulltrúi Play staðfestir í samtali við fréttastofu að morgunflugi til Evrópu hefur verið seinkað í fyrramálið og einni ferð, til Frankfurt, verið aflýst, vegna veðursins. Flugferð Play til Tenerife hefur verið seinkað frá klukkan níu til rúmlega tvö. Þá hefur komum frá Norður-Ameríku með Play í fyrramálið verið seinkað. 

Að sögn Birgis stafa seinkanirnar af miklum vindi sem spáð er að verði á flugvellinum en hann gerir farþegum erfitt fyrir að komast í og úr flugvélum. 

Ásdís Ýr Pétursdóttir upplýsingafulltrúi Icelandair segir í samtali við fréttastofu að ferðum frá Norður-Ameríku hefur verið seinkað í fyrramálið vegna veðursins. Allar vélar lendi skömmu eftir klukkan hálfsjö. Komum flugferða félagsins frá bæði Köln og Nuuk hefur þó verið aflýst.

Þá segir Ásdís að brottförum til Evrópu gæti seinkað lítillega. 

Fréttin hefur verið uppfærð.