Hlær að því þegar fólk heldur að hann sé miklu eldri en hann er

Það eru þó nokkuð margir sem trúa því ekki að Littler sé ekki enn búinn að halda upp á sautján ára afmælið sitt. Hann lítur vissulega út fyrir að vera miklu eldri.

Frábær og yfirveguð frammistaða hans fyrir framan píluspjaldið er líka í engu samhengi við það að hann sé ekki kominn á bílprófsaldurinn.

Littler varð reyndar að sætta sig við tap í úrslitaleiknum á heimsmeistaramótinu í pílukasti en hann var sá langyngsti í sögunni sem kemst alla leið í úrslitaleikinn. Hann hefur líka mörg ár upp á að hlaupa til að vera sá yngsti til að verða heimsmeistari.

Littler sjálfur segir að þessar vangaveltur um aldur hans séu ekki nýjar á nálinni. Hann hefur þurft að hlusta á þetta mjög lengi.

„Fólk á eftir að segja að ég sé með myndarlegt skegg. Sumir sextán ára eru ekki með eitt skegghár og meira segja þeir eldri líka,“ sagði hlæjandi Luke Littler um þessa aldursumræðu í viðtali við breska ríkisútvarpið.

„Þetta er búið að vera svona í mörg ár. Þegar ég var fjórtán ára gamall þá var fólk að segja: Hann er ekki fjórtán ára, hann er ekki fimmtán ára,“ sagði Littler.

„Þetta pirrar mig ekkert. Ég veit að ég er sextán ára. Þetta er búið að vera lengi í gangi en ég loka alveg á þetta og hlæ bara að þessu,“ sagði Littler.

„Ég svara þessu fólki ekki og eyði ekki athyglinni minni í það,“ sagði Littler en það má sjá hann ræða þetta hér fyrir neðan. Ef Instagram færslan birtist ekki er gott ráð að endurhlaða fréttina.