Atlético Madrid kastaði frá sér tveggja marka for­ystu

Heimamenn ætluðu ekki að gera sér auðvelt fyrir í kvöld og Stefan Savic nældi sér í sitt annað gula spjald í leiknum á 38. mínútu og þar með fékk hann að fara í snemmbúna sturtu. Atlético þurfti því að spila seinustu rúmlega 50 mínútur leiksins manni færri.

Þrátt fyrir liðsmuninn kom Antoine Greizmann liðinu í forystu með marki á 44. mínútu og staðan var því 1-0 þegar flautað var til hálfleiks og liðin gengu til búningsherbergja.

Borja Mayoral jafnaði þó metin fyrir Getafe á 53. mínútu áður en Alvaro Morata og Antoine Greizmann komu heimamönnum í 3-1 forystu með sínu markinu hvor á 63. og 69. mínútu.

Lengst af leit út fyrir að tíu leikmenn Atlético myndu vinna sterkan sigur, en Oscar Rodriguez gaf gestunum von með marki þegar um fimm mínútur voru eftir af venjulegum leiktíma. 

Það var svo komið fram í uppbótartíma þegar gestinrir fengu vítaspyrnu eftir að Rodrigo Riquelme handlék knöttinn innan vítateigs. Borja Moyaral fór á punktinn og jafnaði metin fyrir Getafe á þriðju mínútu uppbótartíma og þar við sat.

Niðurstaðan því 3-3 jafntefli og Atlético Madrid situr nú í þriðja sæti deildarinnar með 35 stig eftir 17 leiki, níu stigum á eftir toppliði Girona. Getafe situr hins vegar í áttunda sæti með 26 stig.