Óraf­mögnuð og nota­leg stund með Bylgjunni

Næstu fimmtudagskvöld mun rjóminn af íslensku tónlistarfólki koma þar fram en tónleikaröðin endar á jólatónleikum 16. desember þar sem tónlistarfólkið syngur uppáhalds jólalag sitt.

„Þetta er þriðja árið sem við höldum þessa tónleikaröð og ég hef fengið að leiða þetta verkefni frá upphafi,“ segir Vala Eiríks, útvarpskona á Bylgjunni, sem spjallar meðal annars við tónlistarfólkið á milli laga. „Stemningin er alltaf á notalegu nótunum hjá okkur á sviðinu og tónleikagestir finna svo sannarlega fyrir því. Við höfum stækkað tónleikaröðina og betrumbætt með hverju árinu og höldum líklega áfram að þróa hana eftir tilfinningunni næstu árin. Viðtökurnar hafa verið vonum framar og það er gaman að sjá að fólk vilji persónulega samveru með tónlistafólkinu okkar.“

Við val á tónlistarfólki er reynt að hafa fjölbreytnina í fyrirrúmi að sögn Völu. „Sjálf hef ég skotið að nöfnum sem ég væri til í að sjá lyft upp, enda er tónleikaröðin frábær vettvangur fyrir nýja listamenn til að kynna sig fyrir þjóðinni.“

Á morgun fimmtudag verða tónleikar með Friðriki Dór og næst stíga á svið, í þessari röð, þau Una Torfa, Ragga Gísla og Jónas Sig. Lokaþátturinn 16. desember er svo sérstakur jólaþáttur eins og fyrr segir. Búið er að taka alla tónleikana upp og var stemmingin alveg stórkostleg að sögn viðstaddra.

Vala segir það fyrst og fremst vera listamennina sjálfa sem gera þessa tónleikaröð svona skemmtilega. „Í spjalli mínu við þau milli laga reyni ég að fara aðeins undir yfirborðið, eða eins langt og ég finn að þau eru tilbúin að hleypa mér. Það er svo mikilvægt að mínu mati því fólk vill fá tilfinningu fyrir manneskjunni sem stendur á bak við lögin sem landsmönnum þykir svo vænt um. Bæjarbíó er líka einstaklega hlýr og skemmtilegur tónleikastaður. Þótt hann rúmi ágætis slatta af fólki, þá nær maður að halda í nándina við salinn.“

Hún segir ómögulegt að gera upp á milli einstakra tónleika í tónleikaröðinni. „Það var eitthvað einstakt sem fylgdi hverjum listamanni fyrir sig. Mér fannst þó sérstaklega gaman að kynnast Unu Torfa, því hún var sú eina sem ég hafði ekki hitt áður. En öll voru þau æðisleg!“

Lokatónleikarnir 16. desember verða með öðru sniði enda jólatónleikar. „Við tókum upp jólalag og smá jólaspjall við hvern listamann í lok tónleika þeirra. Salurinn stóð sig stórvel í að halda jólagleðinni uppi og ekki að finna að það hafi stungið neinn að njóta jólanna saman í október.“

Allir tónleikar í tónleikaröðin Bylgjan órafmögnuð hefjast á kl. 20 á Bylgjunni, Vísi og sjónvarpsstöðinni Stöð 2 Vísi.

Hér er hægt að skoða eldri upptökur frá Bylgjan órafmögnuð.