Ó­trú­leg endur­koma í hádramatískum leik

FC Kaupmannahöfn vann 4-3 sigur á Manchester United í hádramatískum leik þar sem rautt spjald leit dagsins ljós. United tapaði niður tveggja marka forystu eftir að hafa lent manni undir, komst aftur yfir en heimamenn skoruðu tvívegis undir lokin og sóttu sigurinn.  

Rasmus Højlund skoraði fyrstu tvö mörkin fyrir Man. United gegn uppeldisfélagi sínu. Liðið mátti þó þola brotthvörf eftir að Raphael Varane fór meiddur af velli á 16. mínútu og Marcus Rashford var rekinn af velli undir lok fyrri hálfleiks. 

 Þrettán mínútum var bætt við fyrri hálfleikinn og heimamenn nýttu tímann vel. Mohamed Elyounoussi minnkaði muninn áður en Diogo Goncalves kom FCK yfir rétt áður en flautað var til hálfleiks. 

Manchester United fékk vítaspyrnu á 69. mínútu og sendu fyrirliðann Bruno Fernandes á punktinn sem skoraði af öryggi, Alejandro Garnacho fagnaði marki hans með því að sussa á aðdáendur FCK sem létu vel í sér heyra allan leikinn. 

FCK gerði fjórar breytingar á liði sínu í kjölfarið, tvær breytingar voru gerðar í fremstu línu liðsins og Orri Steinn Óskarsson var meðal varamanna sem komu inn á völlinn. 

Lukas Lerager jafnaði svo metin á 83. mínútu áður en ungstirnið Roony Bardghji skoraði sigurmarkið fjórum mínútum síðar. 

Harry Maguire fékk svo að líta gult spjald fyrir kjaftbrúk rétt áður en leikurinn var flautaður af. 

Eftir úrslit kvöldsins er Manchester United í neðsta sæti A riðils Meistaradeildarinnar með einn sigur úr fyrstu fjórum leikjunum. Þeir eiga næst útileik við Galatasaray áður en þeir taka á móti Bayern Munchen í síðustu umferðinni. FCK spilar leiki gegn sömu liðum í öfugri röð og eiga góðan möguleika á að komast upp úr riðlinum.