Segir gjaldið ekki ó­lög­mætt og mikil­vægt að forðast mis­skilning

Vísir greindi frá því í gær að Stúdentaráð HÍ hefði boðað til blaðamannafundar klukkan 11 í dag vegna úrskurðar nefndarinnar, sem komst að þeirri niðurstöðu að eins og sakir stæðu væri ekki grundvöllur fyrir innheimtu skrásetningargjalds HÍ.

Var úrskurður háskólaráðs um að endurgreiða ekki nemanda gjaldið þannig felldur úr gildi.

Jón Atli segir hins vegar fjarri sanni að segja að gjaldið hafi verið úrskurðað ólögmætt.

„Það er verið að gera at­huga­semd­ir við það hvernig það er reiknað, hvaða út­reikn­ing­ar liggi að baki og það að gjaldið fari úr 75 þúsund krón­um niður í núll er bara fjar­stæða. Þetta er bara spurn­ing um hvaða út­reikn­ing­ar liggi þarna að baki svo að há­skólaráð þarf að fara aft­ur yfir málið og þá kem­ur ný niðurstaða frá ráðinu,“ segir rektor í samtali við Morgunblaðið.

Virðist hann þarna vilja leiðrétta það sem Stúdentaráð hefur lesið úr úrskurðinum; að HÍ beri nú að endurgreiða öllum nemendum „ólögmæt“ skráningargjöld.

Jón Atli bendir á að skráningargjöldin hafi ekki hækkað í nokkurn tíma en þjónustan verið aukin.

„Niðurstaðan er ein­fald­lega sú að það er verið að segja að ekki nægi­lega traust­ir út­reikn­ing­ar hafi legið fyr­ir. En kostnaður­inn er þarna til staðar og við för­um bara bet­ur yfir málið. En Stúd­entaráð get­ur al­veg haft blaðamanna­fund, það er ekki vanda­málið. Okk­ar sam­band er mjög gott en ég vil að við leiðrétt­um þetta.“

Uppfært kl. 8:45

Rektor hefur sent frá sér svohljóðandi yfirlýsingu:

„Líkt og fram hefur komið í fjölmiðlum hefur áfrýjunarnefnd í kærumálum háskólanema komist að niðurstöðu í máli sem snýr að innheimtu skrásetningargjalda.

Af umfjöllun fjölmiðla um málið má ráða að nokkurs misskilnings gæti um niðurstöðu nefndarinnar. Jafnvel hefur komið fram að nefndin hafi kveðið á um að enginn grundvöllur væri fyrir innheimtu skrásetningargjalds en slíkt er alls ekki rétt.

Í niðurstöðu nefndarinnar kemur einfaldlega fram að útreikningar vissra kostnaðarliða sem felldir hafa verið undir gjaldið séu ekki fullnægjandi.

Eftir að niðurstaðan lá fyrir hófst vinna hér innan Háskólans við að sjá til þess að útreikningar fyrir umrædda kostnaðarliði séu eins og vera ber.

Ég mun tryggja að háskólaráð og fulltrúar stúdenta verði upplýstir um framvindu málsins.“