„Ég hef ekki annan stað til að vera á“

Jakub Malinowski býr á annarri hæð hússins, en eldurinn kom upp í herbergi á fyrstu hæð. Einn var fluttur á slysadeild vegna brunans. 

„Ég heyrði bara brunabjöllu. Ég leit út um gluggann, greip nokkra mikilvæga hluti og dreif mig út, því ég vissi að eitthvað var að gerast,“ segir hann í samtali við fréttastofu.

Hann hafi fengið þau skilaboð að hann megi fara aftur inn í húsið í dag, eða á morgun. 

„En ég vona að það verði í dag, því ég hef ekki annan stað til að vera á,“ segir Jakub. Hann bætir við að hann neyðist sennilega til að gista á hóteli í nótt, fari svo að húsið verði enn innsiglað í nótt. 

Flestir frá Póllandi

Jakub segir nokkurn fjölda fólks búa í húsinu. 

„Á annarri hæðinni, þar sem ég bý, eru um 20 til 30 manns,“ segir hann. Flestir íbúanna séu pólskir eins og hann sjálfur. Þó séu einhverjir frá Litáen, auk nokkurra annarra landa.

Hann segir það hafa verið nokkuð áfall að sjá eldinn koma upp. Hann þekki þó ekki þann sem fluttur var á slysadeild, og viti ekkert hvernig eldurinn kom upp. 

Grípa fólk og veita sálræna hjálp

Fulltrúar Rauða krossins voru á svæðinu, íbúum hússins til halds og trausts.

„Þegar er um svona bruna að ræða þá komum við aðallega að ef það þarf að grípa fólk sem er á staðnum og veita fyrstu sálrænu aðstoð, og eins að reyna að finna út úr því ef fólk vantar samastað,“ segir Aron Birkir Óskarsson, hópstjóri í viðbragðsteymi Rauða krossins á höfuðborgarsvæðinu.

Hann segir fyrstu skref vera að koma fólki af slysstað, en þekkir ekki hversu margir búa í húsinu. Koma þurfi í ljós hvenær fólkið geti snúið aftur heim, en lögregla hefur sagt að mögulega verði það ekki fyrr en á morgun.

„Við munum gera allt sem við getum gert til að hjálpa,“ segir Aron. 

Vinna enn á vettvangi

Jörgen Valdimarsson, varðstjóri slökkviliðs sem fréttastofa ræddi við á vettvangi sagði að búið væri að slökkva eldinn, en áfram yrði unnið að reykræstingu.

Þá sé slökkvilið enn að leita af sér allan grun um að fólk sé enn í húsinu. 

Hann sagðist ekki geta áætlað hversu lengi í viðbót slökkvilið yrði á vettvangi.

„Við verðum bara hér þar til við erum búnir,“ sagði Jörgen.