Truflar Davíð ekki að fólk efist um hann vegna for­­tíðar hans

Davíð Smári hefur hlotið nokkra dóma fyrir líkams­á­rásir í gegnum tíðina og segir hann það gefa sér elds­neyti í starfi sínu sem þjálfari að það séu ein­hverjir sem efist um hann núna sökum for­tíðar hans. 

Finnst þér erfitt að hreinsa for­tíðina og fá kannski þá virðingu sem þú átt skilið sem fót­bolta­þjálfari?

„Ef ég á að vera mjög ein­lægur að svara þessu þá er það bara það sem gefur mér elds­neyti til þess að halda á­fram. Að það séu ein­hverjar efa­semdar­raddir,“ segir Davíð Smári í við­tali við Svövu Kristínu Grétars­dóttur í Sport­pakkanum.

„Fortíðin er að baki fyrir mér“

„Árangur minn sem þjálfari talar sínu máli. Öll þau verk­efni sem ég tek að mér geri ég vel. Ég er mjög stoltur af þeirri vinnu sem ég skila af mér. Það truflar mig alls ekki að það séu ein­hverjir sem eru ekki vissir með mig og mína for­tíð. Ég var ungur og vit­laus, það er enginn að reyna fela það. Ég er bara sá sem ég er í dag og er stoltur af því. For­tíðin er að baki fyrir mér.“

Hvað ein­kennir þig sem þjálfara í dag?

„Ég er mjög kröfu­harður. Er með mjög sterka sýn á leikinn, mjög skýra sýn á hvað ég vil fá frá leik­mönnum. Það eru mín sterkustu ein­kenni sem þjálfari, mínir leik­menn vita sín hlut­verk og vita að ef ég sé það ekki koma frá þeim þá spila þeir ekki marga leiki fyrir mig.“