Lið FM957 byrjar vel í leiknum Leikið um landið

Fyrsta þrautin var keppni um fallegasta blómvöndinn en þá söfnuðust liðin saman hjá blómaheildsölunni Samasem við Grensásveg í Reykjavík.

Sam Mansour, eigandi Samasem, var dómari en honum fannst allir blómvendirnir þrír vera fallegir. Eftir mikla umhugsun kvað hann upp dóminn og lýsti lið FM957 sem sigurvegara.

Lið FM957 fékk því þrjú stig, lið Bylgjunnar fékk tvö stig og X977 fékk eitt stig.

Lið útvarpsstöðvanna þriggja eru skipuð tveimur þátttakendum og berst leikurinn kringum landið þar sem skemmtilegar áskoranir bíða þeirra. Fylgist með hér á Vísi! Lið Bylgjunnar skipa þær Sigga Lund og Þórdís Valsdóttir, lið FM957 skipa Egill Ploder og Rikki G og fyrir hönd X977 keppa Tommi Steindórs og Ingimar.

Strákarnir hjá FM957 komu andstæðingum sínum á óvart með því að vera óvenju vel undirbúnir.

„Það sem við ætlum okkur að gera er að tengja saman allar tilfinningar mannsins eftir litum blómanna. Það verður saga í okkar blómvendi,“ sagði Egill þegar hann útskýrði samsetningu blómvandarins fyrir dómaranum fyrir hönd þeirra félaga. „Eins og við sjáum á blómvendinum okkar er grænn litur mjög ríkjandi. Græni táknar að sjálfsögðu nýtt upphaf en við erum að leggja af stað í nýtt ferðalag.“

„Ertu með handrit?“ spurði Þórdís Valsdóttir úr Bylgjuliðinu undrandi á svip.

„Græni liturinn er einhvern veginn táknrænn fyrir það,“ hélt Egill áfram á lét Þórdísi ekki slá sig út af laginu.

Og áfram hélt Egill sem ætlaði sér greinilega að skora þrjú stig hjá dómaranum. „Blái liturinn táknar alls konar mysteríu sem er í gangi enda vitum við ekki hvað við erum að fara gera næstu daga og hvaða þrautir taka við. Svo í enda ferðarinn verður við öll full af þakklæti sem er svolítið bleiki liturinn í blómvendinum.“

Næsta þraut fer fram síðar í dag en þá heimsækir hópurinn Zipline Iceland á Vík. Þar má búast við skemmtilegum tilþrifum og adrenalínkikki þegar keppendur renna sér niður eftir zipplínunni.

Fylgjast má með á samfélagsmiðlum X977 , FM957 og Bylgjunnar og liðin verða einnig með innkomur í loftinu við hverja þraut. Fylgist með hér á Vísi!