Krist­rún segir al­menning þurfa að­gerðir núna

Bjarni Benediktsson, fjármála- og efnahagráðherra og Kristrún Frostadóttir, formaður Samfylkingarinnar tókust um efnahagsmál í Sprengisandi í morgun. Nýtt fjárlagafrumvarp ráðherra var auðvitað efst á baugi en Kristrún sagði lítið í frumvarpinu taka á þeirri spennu sem sé að finna á markaði eins og stendur.

Hún benti á mikla verðbólgu, það sé búið að hækka stýrivexti fjórtán sinnum og að yfirvofandi séu kjarasamningsviðræður.

Kristrún sagði að þótt svo að ríkið eigi ekki endilega að vera stærsti aðilinn að kjarasamningsviðræðum þá hefði þau, í Samfylkingunni, viljað sjá einhvern sterkari kjarapakka í frumvarpinu þar sem barna- og vaxtabætur væru til dæmis styrktar.

Bjarni svaraði því á þá leið að við þessu væri verið að bregðast með nýjum leiðum og að aðkoma stjórnvalda að bættum kjörum almennings væri sem dæmi í rammasamningum við sveitarfélög um íbúðauppbyggingu.

„Við erum að fara frá vaxtabótakerfinu sem Kristrún talar um yfir í kerfi sem við köllum almennar íbúðir með stofnstyrkjum og húsnæðisbótum,“ sagði Bjarni og að það sem vantaði helst þar væri aukið framboð fjölbreyttari lóða fyrir allar tegundir húsnæðis og að sú þörf yrði ekki uppfyllt á hinum ýmsum þéttingarreitum miðsvæðis í Reykjavík.

Hann benti á áætlanir yfirvalda um að byggja hér 35 þúsund íbúðir til langs tíma sem Kristrún svo gagnrýndi. Hún sagði erfitt fyrir fólk að hugsa um það sem er til langs tíma, þegar staðan er erfið núna með tilliti til vaxtaumhverfis og efnahags.

„Það er ekki bara hægt að segja að til langs tíma verður hér jafnvægi. Þrátt fyrir að raunverð hafi hægt á sér þá stendur fólk frammi fyrir byrðinni núna,“ sagði Kristrún og að stjórnvöld yrðu að axla á því ábyrgð í stað þess að velta ábyrgðinni annað. Eins og á Seðlabankann, sveitarfélög eða vinnumarkað.

Verðbólgan mikilvægasta verkefni

Bjarni og Kristrún tókust svo á um bótakerfið og pólitískar skoðanir sínar á því. Kristrún sagði Ísland standa sig verr en mörg Norðurlöndin sem Bjarni sagði ekki rétt. Hann sagði mikilvægasta verkefni sem við stöndum frammi fyrir eins og stendur að ná tökum á verðbólgunni.

„Við getum náð tökum á verðbólgunni ef við missum ekki þolinmæðina,“ sagði Bjarni. Hann sagði verkefni vandasamt og að ríkið væri að leggja sitt af mörkum með hagræðingaraðgerðum og með því að standa á sama tíma við viðkvæmum hópum.

„Við munum ná stöðugleika á ný.“

Að því loknu fóru þau um víðan völl. Ræddu sveitarstjórnarmál, velferðarsamfélagið, tilfærslur í kerfi og skattkerfið sem þau eru mjög ósammála um.

„Vinstri menn hætta aldrei að fá hugmyndir að sköttum til að hækka,“ sagði Bjarni í umræðu um hækkun fjármagnstekjuskatts sem Kristrún sagði að væri hæfilegur í 25 prósent en ekki 22,5 prósent og þá væri hægt að fá auka fimm milljarða inn í kerfið.

Hún sagðist svo sammála þeim málflutningi Bjarna um að það væri gott að vera á Íslandi, en sagði það þó uppgjöf að láta þar staðar numið. Stjórnmálamenn ættu að vilja gera betur.

Viðtalið er hægt að hlusta á í heild sinni hér að neðan en þeim varð nokkuð heitt í hamsi undir lokin.