Elvar frá­bær í góðum sigri Ribe-Esb­jerg

Elvar Ásgeirsson og Ágúst Björgvinsson leika með Ribe-Esbjerg sem tóku á móti Kolding í dönsku úrvalsdeildinni í handknattleik í kvöld. Elvar fór hamförum, hann skoraði sex mörk úr sjö skotum í 34-28 sigri Ribe-Esbjerg. Ágúst varði átta skot í marki Ribe-Esbjerg eða um 33% þeirra skota sem hann fékk á sig.

Arnór Atlason tók við tveimur þjálfarastörfum í sumar. Annars vegar aðalþjálfarastöðunni hjá liði Holstebro og hins vegar aðstoðarþjálfarastöðu íslenska landsliðisins

Í kvöld var hann var stjórnvölinn hjá Holstebro sem vann 34-33 sigur á Ringsted á heimavelli. Þetta er fyrsti sigur liðsins í vetur en liðið tapaði gegn Nordsjælland í fyrstu umferðinni.

Lið Nordsjælland beið hins vegar lægri hlut gegn Bjerringbro-Silkeborg í kvöld. Halldór Jóhann Sigfússon stýrir liði Nordsjælland en honum tókst ekki að koma í veg fyrir 34-28 tap liðsins í kvöld.

Þá var Guðmundur Guðmundsson ásamt lærisveinum sínum í Fredericia í heimsókn hjá Lemvig-Thyborön. leikurinn var jafn og spennandi en Fredericia leiddi 14-11 þegar flautað var til hálfleiks.

Heimaliðið kom hins vegar til baka í síðari hálfleiknum eftir að gestirnir náðu mest sex marka forskoti. Síðustu tíu mínúturnar voru æsispennandi og Lemvig-Thyborön komst í 27-26 forystu þegar skammt var eftir. Liðið vann síðan boltann á ný, tapaði honum undir lokin og Kristian Stoklund jafnaði metin úr vítakasti fyrir Fredericia þegar leiktíminn var liðinn.

Lokatölur 27-27 og Guðmundur nagar sig eflaust í handarbökin eftir að lið hans missti niður forystuna en getur á sama tíma þakkað fyrir að hafa fengið eitt stig út úr leiknum.