ÍBV meistari meistaranna eftir sigur á Aftur­eldingu

ÍBV var sterkari aðilinn frá upphafi til enda en Eyjamenn leiddu með fjórum mörkum í hálfleik, staðan þá 16-12.

Í síðari hálfleik tókst Aftureldingu að minnka muninn niður í eitt mark, 18-17, en nær komust gestirnir ekki. ÍBV spýtti í lófana og vann á endanum fimm marka sigur.

Lokatölur í Eyjum 30-25 og ÍBV byrjar tímabilið eins og það endaði síðasta tímabil, með því að lyfta titli.

Arnór Viðarsson var markahæstur í liði ÍBV með sjö mörk. Dagur Arnarsson kom þar á eftir með sex mörk. Hjá Aftureldingu skoraði Árni Bragi Eyjólfsson átta mörk og Blær Hinriksson gerði sex mörk.