Costco gert að greiða 20 milljón króna stjórn­valds­sekt vegna olíu­leka

Frá þessu er greint á vefsíðu Umhverfisstofnunar en umrædd brot leiddu til þess að að minnsta kosti 111 þúsund lítrar af dísilolíu losnuðu út í fráveitu Hafnarfjarðar og þaðan út í sjó.

„Costco er starfsleyfisskyldur rekstraraðili í skilningi laga um hollustuhætti og mengunarvarnir nr. 7/1998, sbr. 6. gr. laganna sbr. viðauka IV við lögin. Starfsleyfisskyldum rekstraraðilum ber m.a. að tryggja að starfsemi þeirra sé í samræmi við ákvæði laga um hollustuhætti og mengunarvarnir og reglugerða og starfsleyfisskilyrða settra samkvæmt þeim sbr. 1. mgr. 40. gr. laga nr. 7/1998 um hollustuhætti og mengunarvarnir,“ segir á vefsíðu Umhverfisstofnunar.

Þá segir að stofnunin telji að verulega hafi skort á frumkvæði, vöktun og viðbrögð af hálfu Costco vegna olíulekans. Ákveðið hafi verið að leggja fyrrnefnda sekt á fyrirtækið í ljósi alvarleika brotsins og skorts á árvekni.