Hjólaði heim eftir að hafa skorað þrennu í þýsku deildinni

Behrens skoraði þrennu þegar Union Berlin sigraði Mainz 05, 4-1, í 1. umferð þýsku úrvalsdeildarinnar á laugardaginn. Hann skoraði tvö mörk á fyrstu níu mínútunum og fullkomnaði svo þrennuna á 70. mínútu. Behrens skoraði öll þrjú mörkin með skalla.

Behrens er greinilega nægjusamur maður því hann hjólaði heim til sín eftir leikinn á laugardaginn. Union Berlin birti skemmtilega mynd af þrennumanninum á hjólinu á Twitter.

Union Berlin fékk Behrens frá Sandhausen fyrir tveimur árum. Á síðasta tímabili hjálpaði hann Berlínarliðinu að vinna sér sæti í Meistaradeild Evrópu í fyrsta sinn.