Marka­veisla í Grinda­vík og fall blasir við KR

Grindavík og Grótta voru hlið við hlið í töflunni fyrir leik liðanna suður með sjó í kvöld. Jasmine Colbert kom Grindavík yfir á 17. mínútu þegar hún skoraði úr vítaspyrnu en lokamínútur fyrri hálfleiks voru síðan hálf ótrúlegar.

Hannah Abraham jafnaði fyrir Gróttu á 41. mínútu en Colbert var ekki lengi að koma Grindavík yfir á nýjan leik og skoraði tveimur mínútum síðar. Í uppbótartíma fyrri hálfleiks fékk Grótta síðan tvær vítaspyrnur. Úr fyrri spyrnunni skoraði Ariela Lewis og Hallgerður Kristjánsdóttir úr þeirri síðari. Staðan í hálfleik 3-2 fyrir gestina af Seltjarnarnesi.

Grótta var síðan sterkari aðilinn eftir hlé. Hanna Abraham bætti sínu öðru marki við á 68. mínútu og Arnfríður Auður Arnarsdóttir skoraði fimmta mark Seltirninga á 73. mínútu.

Þegar skammt var eftir klóraði hin 15 ára gamla Tinna Hjaltalín í bakkann fyrir Grindavík. Lokatölur 5-3 og Grótta áfram í 4. sæti deildarinnar, fimm stigum á undan Grindavík sem er í 6. sæti.

Fallið blasir við KR

Í Vesturbænum mættust lið KR og HK. KR, sem situr í fallsæti Lengjudeildarinnar, skoraði fyrsta markið á 9. mínútu en þegar Koldís María Eymundsdóttir kom boltanum í netið.

Í upphafi síðari hálfleiks jafnaði Emily Sands metin og með tveimur mörkum á fimm mínútna kafla seint í hálfleiknum tryggði HK sér sigur. Brookelyn Entz skoraði fyrst á 74. mínútu og Isabella Eva Aradóttir bætti öðru marki við fimm mínútum síðar.

Jewel Boland minnkaði reynar muninn fyrir KR á 80. mínútu en nær komust þær ekki. 

Það er lítið annað en fall í 2. deild sem blasir við KR en liðið lék í Bestu deildinni á síðasta tímabili. Liðið er með sjö stig í níunda sæti deildarinnar, níu stigum á eftir FHL sem gæti fellt KR með sigri á Fram á heimavelli á sunnudag. KR á þrjá leiki eftir í deildinni og þarf að vinna þá alla ætli liðið að halda sér uppi.

HK fer hins vegar upp í annað sæti deildarinnar með sigrinum. Liðið er þremur stigum á eftir toppliði Víkings og þremur stigum á undan Fylki sem er í þriðja sæti en bæði þessi lið eiga þó leik til góða á HK.