Haukar fá Finna til að fylla skarð Hilmars

Hilmar hefur samið við Eisbären Bremerhaven í þýsku B-deildinni og mun leika með liðinu í vetur. Hann var einn besti leikmaður Hauka á síðasta tímabili þar sem hann var með 19,3 stig, 5,0 fráköst og 4,6 stoðsendingar að meðaltali í leik.

Til að fylla skarð Hilmars hafa Haukar samið við Finnann Ville Tahvanainen. Hann er 23 ára og kemur beint úr bandaríska háskólaboltanum. Tahvanainen lék með Bradley Braves þar sem hann var með 6,7 stig, 3,3 fráköst og 1,3 stoðsendingar að meðaltali í leik.

Áður en Tahvanainen fór í háskóla spilaði hann í finnsku B-deildinni. Hann hefur leikið þrjá A-landsleiki fyrir Finnland og hefur verið viðloðandi æfingahóp landsliðsins sem fer á HM síðar í mánuðinum.

Haukar enduðu í 3. sæti Subway deildarinnar á síðasta tímabili og tapaði 3-2 fyrir Þór Þ. í átta liða úrslitum úrslitakeppninnar.