Flottur dagur í Jöklu í gær

Veiðinni er misskipt milli laxveiðiánna það er alveg ljóst. Á meðan það veiðist lítið í sumum ánum eiga aðrar mjög góða daga og dæmi um það var gærdagurinn í Jöklu. Það veiddust 27 laxar og nokkrir unnu baráttu sína við veiðimenn og fóru sína leið eins og gengur og gerist. Stærsti laxinn sem veiddist í gær var þessi sem sést á meðfylgjandi mynd en hann mældist 98 sm og veiddist á Nesbreiðu. Það hefur verið kalt við Jöklu síðustu daga og vikur eins og annars staðar á norðausturlandi en það hefur ekki haft mikil áhrif á veiðina. Vonandi dregur þetta á langinn að Jökla fari á yfirfall en vegna mikilla hita á Héraði í byrjun sumars er Hálsalón að fyllast. Veiðin í Jöklu verður þá mjög erfið en þá glæðist aftur á móti veiðin í hliðaránum sem annars eru lítið stundaðar.