Hættir tímabundið sem rektor og vinnur að heimildamynd í Úkraínu

Sólrún Dögg Jósefsdóttir skrifar 7. júlí 2023 09:53

Börkur og Valur eru mættir til Úkraínu. Kvikmyndaskóli Íslands

Börkur Gunnarsson, rektor Kvikmyndaskóla Íslands, hefur lagt leið sína til Úkraínu í þeim tilgangi að taka upp heimildamynd um þær menningarbreytingar sem nú eiga sér stað í landinu.

Í tilkynningu á vef Kvikmyndaskólans segir frá ferðalögum Barkar. Á síðasta ári dvaldi Börkur, ásamt Val Gunnarssyni, rithöfundi og blaðamanni, í sex vikur í Úkraínu þar sem þeir fluttu fréttir frá stríðinu fyrir Ríkisútvarpið. Í leiðinni vann Börkur grunn að heimildamynd sem hann hyggst nú klára.

Þá kemur fram að Börkur hefur starfað sem blaðamaður um árabil en hann hóf blaðamannaferil sinn á Balkanskaganum í Bosníustríðinu á tíunda áratugnum og hefur sinnt störfum á átakasvæðum, meðal annars í Afganistan og Írak.

Ferð Barkar hófst á sýningu á fyrstu kvikmynd hans, tékknesku myndinni Silný Kafe, á kvikmyndahátíð í Kosice í Slóvakíu. Þá lá leiðin yfir landamærin til Úkraínu þar sem Börkur og Valur hyggjast ljúka við upptökur á myndinni.

Kvikmyndin Silný Kafe er fyrsta kvikmynd Barkar.Kvikmyndaskóli Íslands

Í fjarveru Barkar kemur Hlín Jóhannesdóttir, framleiðandi og núverandi starfsmannastjóri Kvikmyndaskólans, til með að hlaupa í skarð hans sem rektor skólans.

Kvikmyndagerð á Íslandi Úkraína Innrás Rússa í Úkraínu Bíó og sjónvarp Skóla- og menntamál Málefni Kvikmyndaskóla Íslands