Skagamenn halda í við toppliðin með stórsigri

Lengst af leit út fyrir að markalaust yrði þegar flautað yrði til hálfleiks, en Haukur Haraldsson kom Skagamönnum yfir á annarri mínútu uppbótartíma og heimamenn fóru því með 1-0 forystu inn í hálfleikshléið.

Gísli Laxdal Unnarsson tvöfaldaði svo forystu heimamanna eftir tæplega klukkutíma leik áður en Viktor Jónsson skoraði þriðja mark liðsins á 71. mínútu.

Daníel Jónsson skoraði svo fjórða mark Skagamanna í uppbótartíma og gulltryggði þar með öruggan sigur ÍA.

Niðurstaðan því 4-0 sigur ÍA og Skagamenn eru nú með 17 stig í þriðja sæti deildarinnar eftir níu leiki. Liðið er þremur stigum á eftir toppliði Aftureldingar sem á þó leik til góða. 

Þórsarar sitja hins vegar í sjötta sæti með 13 stig.