Jökla byrjar vel í frábæru vatni

Vatnsstaðan og aðstæður í ánni hafa verið ákjósanlegar síðustu daga og gefur opnunin á ánni nokkrar vonir um að framundan gæti verið annað ágætt sumar í ánni. Hún er í júlí rennsli, svo gott sem hrein og vatnshitinn um 13-15 gráður sem er frábært fyrir tökugleðina. Fyrsta hollið er nú við veiðar og var komið með tíu laxa á land eftir fyrsta dag ásamt því að nokkuð hafði sloppið. 

Fyrsti lax sumarsins veiddist í Skipalá sem er einn af "gömlu" þekktu veiðistöðunum en veiðin síðustu tvö ár hefur verið vaxandi fyrir ofan veiðistaðinn Steinboga sem var áður efsti staður. Eftir að hann var gerður laxfær er sífellt meira að veiðast þar fyrir ofan en það svæði er eitt flottasta fluguveiðisvæði landsins og þar á ennþá eftir að finna fleiri veiðistaði. Mikið hefur verið lagt í nýja aðstöðu fyrir veiðimenn í Jöklu og verður aðbúnaður veiðimanna frábær þar í sumar sem og leiðsögumanna.