Fram­kvæmda­stjóri Úr­vinnslu­sjóðs hættir

„Um þessar mundir stendur Úrvinnslusjóður á tímamótum. Hlutverk Úrvinnslusjóðs hefur og er að taka miklum breytingum samfara innleiðingu hringrásarhagkerfisins og hefur mikilvæg reynsla myndast síðustu ár og mánuði,“ svo hefst tilkynning á vef Úrvinnslusjóðs, þess efnis að framkvæmdastjóri sjóðsins frá stofnun sé að láta af störfum.

Þar segir að til þess að sjóðurinn geti sinnt sínu hlutverki með sem bestum hætti sé ljóst að starfsemin þurfi að vera opnari, framsýnni og kvikari. Umbreyting sé óhjákvæmileg og þó nú þegar sé unnið að breytingum undir stjórn Ólafs Kjartanssonar framkvæmdastjóra sé bæði honum og stjórn Úrvinnslusjóðs ljóst að mikið verk er enn óunnið.

„Uppbygging og rekstur Úrvinnslusjóðs hefur hvílt á herðum Ólafs í rúm tuttugu ár, þ.e. frá stofnun sjóðsins þann 1. janúar 2003. Ólafur hefur reynst Úrvinnslusjóði afar vel, ekki síst við uppbyggingu starfseminnar í samræmi við hlutverk hans. Nú þykir hins vegar rétti tíminn til breytinga og hafa stjórn Úrvinnslusjóðs og Ólafur komist að samkomulagi um að hann ljúki störfum sem framkvæmdastjóri sjóðsins frá og með 1. júlí 2023 að telja,“ segir í tilkynningu.

Þá segir að að leiðarlokum þakki stjórn Úrvinnslusjóðs Ólafi Kjartanssyni gott og óeigingjarnt starf í þágu sjóðsins og óski honum velfarnaðar í framtíðinni.

Starf framkvæmdastjóra verður auglýst á næstu dögum. Margrét Kjartansdóttir lögfræðingur mun gegna hlutverki staðgengils framkvæmdastjóra frá 1. júlí og þar til nýr framkvæmdastjóri hefur störf.

Hættir þegar sjóðurinn er hvað mest milli tannana á fólki

Úrvinnslusjóð hefur borið meira á góma fólks undanfarnar vikur en venjulega. Upp komst um sannkallað endurvinnsluhneyksli þegar Heimildin greindi frá því að pappafernur, sem almenningur hefur almennt skolað og flokkað samviskusamlega, eru ekki endurnýttar heldur nýttar til þess að knýja sementsverksmiðjur á meginlandinu.

Úrvinnslusjóði er ætlað að hvetja til endurvinnslu úrgangs. Hann sýslar með svonefnt úrvinnslugjald sem er greitt af öllum vörum í plast- og pappírsumbúðum sem eru fluttar inn til landsins.

Úrvinnslugjaldið er nýtt til að greiða fyrir meðhöndlun og endurnýtingu varanna eða umbúðanna eftir að þær hafa þjónað upphaflegum tilgangi sínum. Þannig fá fyrirtæki sem endurvinna plast til dæmis ákveðna upphæð fyrir hvert kíló sem er endurunnið en lægri upphæð sé plastið brennt til orkuframleiðslu.

Ljóst er að úrvinnslugjaldinu hefur ekki verið úthlutað sem skyldi, enda hefur sjóðurinn greitt háar fjárhæðir fyrir endurvinnslu ferna, sem voru alls ekki endurunnar.