„Þetta hefur verið í stöðugri og kerfisbundinni vinnslu undanfarin tvö ár“

Liðið pressar vægast sagt ofarlega á vellinum og setur andstæðinga sína undir mikla pressu. Bræðurnir Guðni og Hlynur Eiríkssynir stýra FH liðinu með harðri hendi. Vísir tók Guðna tali og forvitnaðis um ástæðu þess að láta liðið fara í jafn djarfa pressu og raun ber vitni.

Slíkur leikstíll þarfnast mikillar þjálfunnar. Bæði hvað skipulag varðar en ekki síst fyrir líkamlegt atgerfi leikmanna.

„Þetta hefur verið í stöðugri og kerfisbundinni vinnslu undanfarin tvö ár. Frá því við féllum á Covid tímabilinu höfum við unnið að þessu. Það tekur tíma að þróa svona stíl og byggja eitthvað DNA,“ segir Guðni.

FH var nálægt því að komast upp úr Lengjudeildinni árið 2021. Liðið fékk hinsvegar fjórum stigum minna en Afturelding og sat eftir með sárt ennið það árið. Í fyrra unnu FH-ingar Lengjudeildina, fór taplaust í gegnum tímabilið og spilaði frábæran fótbolta.

„Það var gæfuspor að liðið fór ekki upp það ár. Vegna þess að við vorum ekki tilbúin og þurftum annað ár í Lengjudeildinni til að þróa og betrumbæta leikstíl liðsins. Við töldum að liðið væri klárlega tilbúið til þess að fara upp í efstu deild í fyrra,“ segir Guðni.

Á þessu tímabili byrjaði FH deildina á að tapa 4-1 gegn Þrótti. Í þeim leik var varnarleikur liðsins slæmur og liðið leit ekki vel út án boltans. Næsti leikur tapaðist 2-0 gegn Íslandsmeisturunum og spá Vísis um að FH myndi falla passaði vel við byrjunina.

Eftir það hefur liðið jafnt og þétt rétt úr kútnum. Vann 2-0 sigur á Stjörnunni, í síðustu umferð. Stjörnunni var spáð Íslandsmeistaratitlinum. Sigurinn var sá þriðji í röðinni og liðið virkar sannfærandi og vel skipulagt.

„Þetta hefur gengið vel. Stelpurnar hafa náð að aðlagast deildinni hratt og örugglega. Fyrstu leikirnir voru sveiflukenndir en að sama skapi á mörgum sviðum góðir. Við gáfum liðunum leik, þó úrslitin hafi ekki fallið með okkur. Við vissum að það væri tímaspursmál hvenær þetta myndi fara að detta. Við náðum að laga þá hluti sem við sáum þörf á að laga,“ segir Guðni.

Hann segir að undirbúningstímabilið hafi verið algjör lykill í að spila boltann sem það vill spila. Guðni, Hlynur og Hjörtur Hinriksson, styrktarþjálfari liðsins, þjálfuðu liðið til þess að hlaupa mikið og hlaupa hreinlega yfir andstæðinginn.

„Við unnum á kerfisbundinn hátt að því að auka hlaupagetu og kraft liðsins. Allar mælingar og tölur sýndu og gáfu okkur trú á því að við værum að gera rétta hluti. Við erum með frábæran styrktarþjálfara í Hirti. Undir handleiðslu hans sáum við mikinn mun á liðinu og við náðum nánast öllum leikmönnum upp í elítu tölur.

Við vitum að mikil hlaupageta skiptir gríðarlega miklu máli til að geta spilað þennan fótbolta sem við viljum spila. Tölurnar á móti Stjörnunni sýna okkur gríðarlega hlaupavinnu, frá öftustu línu og upp í fremstu línu. Það sem allir leikmenn liðsins hlupu yfir tíu kílómetra og sprett tölur voru háar,“ segir Guðni.

FH er með jafnmörg stig og Þróttur í þriðja til fjórða sæti. Þremur minna en Breiðablik og sex stigum minna en Íslandsmeistarar Vals. Leikstíll FH-liðsins hefur vakið gríðarlega athygli. Liðið er í fjórða sæti í Bestu deild kvenna eftir átta umferðir en liðinu var spáð falli fyrir mót.

Fróðlegt verður að fylgjast með hvort sú spá rætist eða hvort FH haldi áfram á sömu braut. Næsti leikur í deildinni er gegn ÍBV í Vestmannaeyjum á fimmtudaginn, í Mjólkurbikarnum. Liðin spila aftur en þá í Bestu deildinni 21. júní, þá í Kaplakrika.